पाचोरा तालुक्यातील बाळद बुद्रुक येथील घटना, रुग्णालयात कुटुंबीयांचा आक्रोश
पाचोरा ( प्रतिनिधी ) – पुण्यात नोकरी करत असलेल्या एका २८ वर्षीय तरुणाने पाचोरा तालुक्यातील आपल्या बाळद बुद्रुक येथील शेतात येऊन झाडाला गळफास घेत आत्महत्या केल्याची धक्कादायक घटना आज शनिवारी सकाळी समोर आली आहे. पाचोरा पोलीस स्टेशनला अकस्मात मृत्यूची नोंद करण्यात आली आहे.
समाधान पाटील असे या तरुणाचे नाव आहे. समाधानच्या पश्चात त्याचे आई-वडील आणि एक मोठा भाऊ असा परिवार आहे. (केसीएन)त्याने पाचोरा शिवारात एका झाडाला गळफास घेऊन आपले जीवन संपवले. या घटनेने परिसरात आणि गावात शोककळा पसरली आहे. समाधान पाटील हा पुण्यात नोकरी करत होता. तो आज सकाळी पुण्याहून थेट आपल्या गावी पाचोरा येथे आला. गावाजवळील शेतात जाऊन त्याने हा टोकाचा निर्णय घेतला. सकाळी ७ वाजण्याच्या सुमारास ही घटना घडली.
समाधानने आत्महत्या करण्यामागचे कारण अद्याप अस्पष्ट आहे. घटनेची माहिती मिळताच पाचोरा पोलिसांनी घटनास्थळी धाव घेतली.(केसीएन)पंचनामा करून मृतदेह पाचोरा ग्रामीण रुग्णालयात आणण्यात आला आहे. या प्रकरणी पाचोरा पोलीस ठाण्यात अकस्मात मृत्यूची नोंद करण्यात आली असून, पोलीस निरीक्षक अशोक पवार यांच्या मार्गदर्शनाखाली पोलीस कॉन्स्टेबल हरीश अहिरे पुढील तपास करत आहेत. अत्यंत गरीब परिस्थितीतून शिक्षण घेऊन नोकरीला लागलेल्या मुलाने असा टोकाचा निर्णय घेतल्याने कुटुंबीयांनी आक्रोश केला. या घटनेमुळे परिसरात हळहळ व्यक्त होत आहे.
