जळगाव तालुक्यातील ममुराबाद येथील घटना
जळगाव (प्रतिनिधी) : तालुक्यातील ममुराबाद येथे एका तरुणाने कौटुंबिक नैराश्यातून छताला गळफास घेऊन आत्महत्या केल्याची धक्कादायक घटना मंगळवारी दि. १८ रोजी सकाळी ९ वाजता उघड झाली आहे. याप्रकरणी तालुका पोलीस स्टेशनला अकस्मात मृत्यूची नोंद करण्यात आली आहे.
दीपक अशोक निकम (वय ३८) असे मयत तरुणाचे नाव आहे. तो गावात परिवारासह राहत होता. गेल्या अनेक दिवसांपासून तो कौटुंबिक कारणावरून नैराश्यात गेला होता, अशी माहिती नातेवाईकांनी दिली.(केसीएन) मंगळवारी सकाळी त्याने राहत्या घरी कोणी नसताना छताला गळफास लावून घेत आत्महत्या केली. घटना उघड झाल्यावर कुटुंबीयांनी त्याला शासकीय वैद्यकीय महाविद्यालय व रुग्णालयात उपचारासाठी दाखल केले.
तेथे वैद्यकीय अधिकाऱ्यांनी तपासून मयत घोषित केले. यावेळी कुटुंबीयांनी एकच आक्रोश केला. रुग्णालयात दिपकच्या नातेवाईकांनी, मित्रांनी गर्दी केली होती. घटनेप्रकरणी तालुका पोलीस स्टेशनला अकस्मात मृत्यूची नोंद करण्यात आली आहे.
