जळगाव ( प्रतिनिधी ) — रामेश्वर कॉलनीतील सिद्धार्थनगरात तलवार घेऊन दहशत पसरविणाऱ्या तरुणाला एमआयडीसी पोलिसांनी मध्यरात्री अटक केली. एमआयडीसी पोलिस ठाण्यात गुन्हा दाखल करण्यात आला आहे.
सागर पुनम कंडारे (वय-२४ , रा. सिद्धार्थनगर रामेश्वर कॉलनी) असे अटक केलेल्या संशयित आरोपीचे नाव आहे. तो रामेश्वर कॉलनी परिसरात हातात ३० इंच लांबीची लोखंडी तलवार घेऊन दहशत माजवत असल्याची गोपनिय माहिती एमआयडीसी पोलिस ठाण्याचे पो नि प्रताप शिकारी यांना मिळाली. त्यानुसार पोलीस उपनिरीक्षक अनिस शेख, पो ना सुधीर साळवे, हेमंत कळसकर, चंद्रकांत पाटील, इमरान शेख यांनी रामेश्वर कॉलनीत रात्री १२.३० वाजेच्या सुमारास गस्तीवर असतांना संशयित आरोपी सागर कंडारे याला ताब्यात घेतले. त्याच्याजवळून ३० इंच लांबीची लोखंडी तलवार हस्तगत केली आहे. पो. कॉ. इम्रान बेग यांच्या फिर्यादीवरून एमआयडीसी पोलीस ठाण्यात संशयित आरोपी सागर कंडारे याच्याविरोधात गुन्हा दाखल करण्यात आला. पुढील तपास एमआयडीसी पोलीस करीत आहे.
