जळगावतही सवलत देण्यास सुरुवात
जळगाव (प्रतिनिधी) : महाराष्ट्र राज्य परिवहन महामंडळाच्या सर्व बसेसमध्ये सर्व प्रकारच्या महिलांना प्रवासी भाड्यामध्ये ५० टक्के सवलत देण्याची महिला सन्मान योजना आज दि. १७ मार्च पासून लागू करण्यात आली आहे. याचा लाभ देण्यास जळगावातही सुरुवात झाली आहे.
सदर योजनेबाबतचे परिपत्रक व पत्र राज्याचे वाहतूक विभागाचे महाव्यवस्थापक यांनी राज्यातील सर्व विभाग नियंत्रकांना पाठवले आहेत. त्यानुसार विविध सूचना करण्यात आले आहेत. राज्य परिवहन महामंडळाच्या साधी, मिनी, वातानुकूलित, शिवशाही, शिवाई, शयन आसनी अशा सर्व प्रकारच्या बसेसमध्ये ही सवलत लागू करण्यात येत आहे.
ही सवलत फक्त महाराष्ट्र राज्याच्या हद्दीपर्यंत राहील. ही सवलत शहरी वाहतुकीला लागू नाही. ७५ वर्षावरील नागरिकांना मोफत प्रवास असून ६५ ते ७५ वयोगटातील महिलांना महिला सन्मान योजना हीच सवलत लागू राहील. तर ५ ते १२ वयोगटातील मुलांना पूर्वीप्रमाणेच ५०% सवलत राहील, असे पत्रात म्हटले आहे.
परिवहन महामंडळाच्या जळगावच्या कार्यालयातदेखील याबाबतचे परिपत्रक मिळाले असून महिलांना लाभ देण्यासाठी सकाळपासून सुरुवात झालेली आहे. जळगाव जिल्ह्यात सकाळपासून निघालेल्या सर्व राज्य परिवहन महामंडळाच्या बसेस मध्ये महिलांना ५० टक्के लाभ मिळत असल्यामुळे महिला वर्गात समाधानाचे वातावरण आहे. दरम्यान आता एसटी महामंडळाने बसेसच्या संख्या आणि फेऱ्या दोन्ही वाढवाव्यात. तसेच बसमध्ये या सवलत योजनेमुळे होणारी संभाव्य गर्दी नियोजन करून नियंत्रित करावी अशी मागणी आता नागरिकांकडून केली जात आहे.
