ग्रामस्थांच्या वतीने मावळते अधिकारी गणेश फड यांना निरोप
जामनेर (प्रतिनिधी) : फतेपूर पोलीस स्टेशनचे पहिले प्रभारी पोलीस अधिकारी म्हणून सहा.पो.नि. गणेश फड यांची नियुक्ती करण्यात आलेली होती. त्यांनी पोलीस स्टेशनचा कारभार पारदर्शकपणे-१२ ते १३ महिने चालविला. त्यांची विनंतीवरून मुख्यालयी बदली करण्यात आली आहे. गणेश फड यांना निरोप व रावेर पोलीस स्टेशनमधून बदलून फत्तेपूर पोलीस स्टेशनला रुजू झालेले सहा. पोनि अंकुश जाधव यांच्या स्वागत समारंभाचे आयोजन पोलीस स्टेशनमध्ये करण्यात आलेले होते.
एका वर्षापूर्वी फत्तेपूर पोलीस स्टेशनची निर्मिती झाली. पोलीस स्टेशन अंतर्गत ३६ गांवाचा कारभार चालतो. सहा.पो.नि.गणेश फड यांनी एक कर्तव्यदक्ष अधिकारी असल्याचे दिसून आले आहे. त्यांनी ज्या प्रमाणे कायदा व सुव्यवस्था राखून गोरगरीबाना न्याय देण्याचा प्रयत्न केला. यासाठी त्यांनी वेळोवेळी कठोर भूमिका बजावली. तोच प्रयत्न मी प्रामाणिकपणे करेल. कोणावर अन्याय होणार नाही, अशी ग्वाही नव्याने रुजु झालेले सहा.पो. नि. अंकुश जाधव यांनी फत्तेपूर पोलीस स्टेशनमधील कार्यक्रमात दिली. याप्रसंगी सहा. पोनि गणेश फड यांनी त्यांच्या कार्यकाळात आलेल्या चढउताराविषयी दिलखुलास चर्चा करून पोलीस स्टेशनच्या निर्मितीसाठी केलेले प्रयत्न व ३६ गांवातील लोकांसोबत आलेले बरे-वाईट अनुभव सांगितले.
त्यानंतर पुना शेजुळे, सलीम पटेल, सुरेश सोनार, पोहेकों प्रवीण चौधरी, सचीन पाटील यांनी मनोगत व्यक्त केले. या प्रसंगी पोलीस स्टेशनच्या वतीने सहा.पोनि गणेश फड यांना निरोप देण्यात आला. नव्याने रुजू झालेले सहा. पोनि अंकुश जाधव यांचे स्वागत करण्यात आले. ग्रामपंचायतीच्या वतीने तसेच पत्रकार संघटनेच्या वतीने, पोलीस पाटील संघटनेच्या वतीने व शक्ती संघर्ष संघटनेच्या वतीने दोघंही अधिकारी वर्गाचा निरोप व स्वागत करण्यात आले. यावेळी कार्यक्रमाला ३६ गांवातून आलेले पोलीस पाटील यांच्यासह पोलीस स्टेशनचे पोलीस कर्मचारी उपस्थित होते.
