जामनेर तालुक्यात अपघातांची मालिका सुरूच
जामनेर (प्रतिनिधी) :- तालुक्यातील पहूर येथून जवळच असलेल्या सोनाळा फाट्याजवळ मध्यरात्री महिंद्रा पिकअप वाहन पलटी होऊन झालेल्या अपघातात १४ जण जखमी झाल्याची घटना घडली. याप्रकरणी पोलीस स्टेशनला नोंद घेण्यात आली आहे.
पहूर येथून जवळच असलेल्या जामनेर रोडवरील सोनाळा फाट्याजवळ मध्यरात्री महिंद्रा पिकप गाडी पलटी झाली. या झालेल्या अपघातात एकूण १४ जण जखमी झाले. यातील धर्मा बारेला (वय ३०), जितेंद्र बारेला (वय १६), सुभा राजू बारेला (वय १३), तुळशीराम बारेला (वय ३५), अनिल तोवरसिंग बारेला (वय ३०) हे गंभीर जखमी झाले. तात्काळ जिल्हा रुग्णालयात उपचारार्थ पाठविण्यात आले. ९ जणांना पहूर ग्रामीण रुग्णालयात आणून त्यांच्यावर प्राथमिक उपचार करण्यात आले.
पहूर परिसरात गेल्या तीन दिवसांपासून अपघाताची मालिका सुरू असून यात परवा मध्यरात्री पहूर येथे जामनेर रोडवर मक्का वाहतुकीच्या रोडवर वाळत टाकलेल्या असल्यामुळे मोटर सायकल व ४०७ च्या झालेल्या अपघातात दोन जण जागीच ठार झाल्याची घटना घडते न घडते तोच दुपारी साडेचार वाजेच्या सुमारास आयशर व यामाहा मोटरसायकल मध्ये झालेल्या अपघातात दोन जण गंभीर झाले होते. पाळधी जवळ झालेल्या अपघातात वाहन चालकाचा मृत्यू झाला होता. तसेच शेंदुर्णी येथेही ट्रॅक्टरवरून पडून १ जण मयत झाल्याची घटना घडली होती. या सततच्या अपघातामुळे पहूर परिसरात भितीचे वातावरण पसरले आहे.
