चोपडा तालुक्यातील मालापुर येथील घटना
जळगाव (प्रतिनिधी) : चोपडा तालुक्यातील मालापुर येथे शेतातील घरामध्ये एका १३ वर्षीय मुलीला अचानक पायाला सापाने चावा घेतल्यामुळे बालिकेची प्रकृती गंभीर झाली होती. उपचारदरम्यान जळगावात तिचा मृत्यू झाला आहे. यावेळी रुग्णालयात कुटुंबीयांनी आक्रोश व्यक्त केला. जिल्हापेठ पोलीस स्टेशनला प्राथमिक अकस्मात मृत्यूची नोंद करण्यात आली आहे.
बाईसी शंकर पावरा (वय १३, रा. मालापूर ता. चोपडा) असे मयत बालिकेचे नाव आहे. ती कुटुंबीयांसह शेतातील घरामध्ये राहत होती. हात मजुरी करून कुटुंबीयांचा उदरनिर्वाह सुरु होता.(केसीएन)दरम्यान रविवारी दि. ८ जून रोजी पहाटे ४ वाजता राहत्या घरी बाईसी हिला पायाला अचानक सापाने चावा घेतला. कुटुंबीयांना लक्षात येताच त्यांनी चोपड्याच्या ग्रामीण रुग्णालयात दाखल केले. तेथून सोमवार दि. ९ जून रोजी जळगाव येथील शासकीय वैद्यकीय महाविद्यालय व रुग्णालयात उपचारासाठी दाखल करण्यात आले. उपचार सुरू असताना मंगळवारी दि. १० रोजी सकाळी सव्वा अकरा वाजता या बालिकेचा मृत्यू झाला आहे. यावेळी कुटुंबीयांनी एकाच आक्रोश केला. दरम्यान घटनेची जिल्हापेठ पोलीस स्टेशनला प्राथमिक अकस्मात मृत्यूची नोंद करण्यात आली आहे. बालिकेच्या मृत्यूमुळे मालापूर गावामध्ये शोककळा पसरली आहे.
