आसोदा गावातील घटना ; महावितरण कंपनीच्या कारभारावर ग्रामस्थांचा संताप
जळगाव (प्रतिनिधी) : तालुक्यातील आसोदा गावात विज गेल्यामुळे ईलेक्ट्रीक मोटारचे बटन बंद करण्यासाठी विवाहिता गेली असता अचानक लाईट आल्याने विजेचा जोरदार धक्का बसून दूर दगडावर फेकली गेली. यात महिलेचा जागीच मृत्यू झाल्याची घटना मंगळवारी दिनांक २५ जून रोजी सकाळी ८ वाजेच्या सुमारास घडली. या घटनेमुळे गावात हळहळ व्यक्त होत आहे. याबाबत तालुका पोलीसात अकस्मात मृत्यूची नोंद करण्यात आली आहे.
संगिता मच्छिंद्र कुंभार (वय ४० रा. आसोदा ता. जि.जळगाव) असे मयत महिलेचे नाव आहे. संगिता कुंभार या महिला पती व दोन मुलांसह जळगाव तालुक्यातील आसोदा गावात वास्तव्याला होत्या. मंगळवारी दिनांक २५ जून रोजी सकाळी गावात नळाला पाणी आलेले होते. त्यांनी ईलेक्ट्रीक मोटार चालु केली होती. त्यावेळी ते पाणी भरत होते. थोड्या वेळाने विद्यूत पुरवठा खंडीत झाला होता. त्यामुळे त्यांचे पती यांनी मोटार बंद करण्याचे सांगून बाहेर गेले. पत्नी संगिता संगिता कुंभार यांनी बटन बंद करण्यासाठी गेल्या तेवढ्यात लाईट आल्याने विद्यूत पुरवठा सुरू झाला आणि त्यांना विजेचा जबर धक्का बसला.
त्यात त्या जोरात फेकल्या जाऊन दूर दगडाजवळ पडल्या आणि त्यांचा जागीच मृत्यू झाला. ही घटना घडल्यानंतर पती मच्छिंद्र कुंभार यांच्यासह ग्रामस्थांनी धाव घेवून खासगी वाहनातून त्यांना शासकीय वैद्यकीय महाविद्यालयात उपचारार्थ दाखल करण्यात आले. वैद्यकीय अधिकारी डॉ. स्नेहल दुगड यांनी तपासणीअंती मयत घोषीत केले. यावेळी रूग्णालयात नातेवाईकांनी एकच आक्रोश केला होता. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली.
