सेंट्रींग काम करताना तरुणाचा विजेचा धक्का लागून जागीच मृत्यू
अमळनेर शहरातील घटना : ठेकेदार, अभियंताविरुद्ध गुन्हा दाखल
अमळनेर प्रतिनिधी
बंद पडलेल्या लिफ्टला पर्यायी व्यवस्था न केल्याने एकाचा विजेचा धक्का लागून मृत्यू झाल्याची घटना १९ जुलैला सकाळी ११:३० वाजेच्या सुमारास घडली. उशिरा फिर्याद दिल्यावरून ठेकेदार आणि अभियंत्याविरुद्ध मृत्यूस कारणीभूत असल्याचा गुन्हा दाखल करण्यात आला आहे.
चोपडा रस्त्यावरील गजानन महाराज मंदिराजवळ ठाकुरदास चांदवाणी यांच्या वाणिज्य इमारतीचे बांधकाम सुरू असून त्याठिकाणी विनायक रतीराम नाईके (रा. सुदामापुरी सिंहाळा, खंडवा, मध्य प्रदेश) हा सेंट्रिंग काम करत होता. त्या ठिकाणची कामावरची पुली बंद पडली होती. त्यामुळे त्याच्या मित्र राजाबाबूने त्याला पाचव्या मजल्यावरुन लोखंडी सळईला दोरी बांधून ओढायला सांगितली. तो सळई ओढत असताना अचानक लिफ्ट सुरु झाली आणि लोखंडी सळईचा लिफ्टच्या विद्युत प्रवाहाला स्पर्श झाल्याने विनायक याला शॉक लागला.
त्याला ग्रामीण रुग्णालयात दाखल केले असता डॉक्टरांनी विनायकला मृत घोषित केले. ठेकेदार सुभाष त्रिभुवन आणि अभियंता निखिल नागदेव यांच्याविरुद्ध विनायकचे वडील नानु याने २८ ऑगस्ट रोजी अमळनेर पोलीस स्टेशनला दिलेल्या तक्रारीवरून ठेकेदार आणि अभियंत्याविरुद्ध गुन्हा दाखल करण्यात आला असून तपास पोलीस उपनिरीक्षक नामदेव बोरकर करीत आहेत
