मुक्ताईनगर तालुक्यातील कोऱ्हाळा येथील घटना
मुक्ताईनगर (प्रतिनिधी) : तालुक्यातील कोर्हाळा-रिगांव शेती शिवारात वीज कोसळल्याने रिगांव येथील मायलेक जखमी झाले. त्यांच्यावर रुग्णालयात उपचार सुरू आहेत.
कुर्हाकाकोडा परिसरात मंगळवारी दुपारी ३ वाजेच्या सुमारास विजांच्या कडकडाटासह पाऊस झाला. कोर्हाळा शिवारात शेतात रिगांव येथील शोभाबाई साहेबराव बेलदार (वय ५५) आणि त्यांचा मुलगा गोकुळ साहेबराव बेलदार (वय २७) हे मायलेक गट नंबर १७३ मध्ये स्वतःच्या शेतात काम करीत होते. पावसामुळे निंबाच्या झाडाखाली आश्रयाला आल्यानंतर काही वेळेत झाडावर वीज कोसळली. विजेचा धक्का दोन्ही माय-लेकांना बसल्याने ते खाली कोसळून बेशुद्ध झाले.
थोड्या वेळानंतर शुद्धीवर असलेल्या गोकुळने गावात घटनेची माहिती कळवली. घटनास्थळी तत्काळ गावातील तरुण धावून आल्यानंतर जखमींना कुर्हा येथे आणण्यात आले व मलकापूर येथील हॉस्पिटलमध्ये दाखल करण्यात आले. रिगांव येथील तरुणांना घटनेची माहिती मिळताच त्यांनी पाऊस सुरू असतांनाच घटनास्थळी धाव घेत जखमींना दवाखान्यात आणले.
