चोपडा तालुक्यातील धानोरा येथील घटना
जळगाव (प्रतिनिधी) :- शेतातील ट्यूबवेल मोटार कनेक्शन देण्यासाठी तीन हजारांची लाच स्वीकारताना धानोरा येथील वरीष्ठ तंत्रज्ञाला जळगाव एसीबीने शुक्रवारी लाच स्वीकारताच अटक केली. त्याच्यावर अडावद पोलीस स्टेशनला गुन्हा दाखल करण्यात आला आहे.
अनिल शंकर राठोड (२८, लक्ष्मी नगर, धानोरा ता. चोपडा) असे लाचखोर तंत्रज्ञाचे नाव आहे. ५० वर्षीय तक्रारदार यांच्या पत्नीचे नावाने देवगाव, ता.चोपडा शिवारात शेत आहे. या शेतात थ्री फेजचे ट्युबवेल मोटारसाठी तक्रारदार यांनी वीज कनेक्शन घेण्यासाठी ऑनलाईन अर्ज केला होता. तक्रारदार अनिल राठोड यांना भेटल्यानंतर २२ रोजी त्यांनी ४ हजारांची लाच मागितली व तीन हजारात तडजोड करण्यात आली.
तक्रारदारांनी याबाबत जळगाव लाचलुचपत प्रतिबंधक विभागाकडे तक्रार दाखल केली होती. शुक्रवारी दि. २२ डिसेंबर रोजी दुपारी लाच स्वीकारताच त्यांना अटक करण्यात आली. अडावद पोलिसात त्यांच्याविरोधात गुन्हा दाखल करण्यात आला. हा सापळा जळगाव एसीबीचे पोलिस उपअधीक्षक सुहास देशमुख, पोलिस निरीक्षक एन.एन.जाधव, पोलिस निरीक्षक अमोल वालझाडे, बाळू मराठे, अमोल सूर्यवंशी, सचिन चाटे तसेच एएसआय दिनेशसिंग पाटील, सुरेश पाटील, रवींद्र घुगे, किशोर महाजन, सुनील वानखेडे, प्रदीप पोळ, राकेश दुसाणे, प्रणेश ठाकुर आदींच्या पथकाने यशस्वी केला.
