प्रजासत्ताक दिनी अमळनेरातील घटना
अमळनेर (प्रतिनिधी) :- शेड नेट घोटाळ्याच्या चौकशीची मागणी करीत प्रजासत्ताक दिनी तालुक्यातील चार शेतकऱ्यांनी स्वत:ला गाडून घेतले. दोन आठवड्यात गुन्हा दाखल करण्याचे आश्वासन मिळाल्याने तीन तासांनी हे आंदोलन मागे घेण्यात आले.
अमळनेर व पारोळा तालुक्यात अनुदानित शेडनेट तसेच पॉलिहाऊसमध्ये घोटाळा झाला. दलालांनी साहित्य शेतकऱ्यांपर्यंत न पोहचविता परस्पर रक्कम हडप केल्याचा आरोप राष्ट्रवादी काँग्रेसचे अध्यक्ष सचिन पाटील, शिवसेनेचे अनंत निकम, कैलास पाटील, नारायण पाटील, ईश्वर पाटील या शेतकऱ्यांनी जिल्हाधिकाऱ्यांना दिलेल्या निवेदनात करण्यात आला होता.
कारवाई न झाल्यास स्वतःला गाडून आंदोलन करण्याचा इशारा देण्यात आला होता. त्यानुसार सचिन पाटील, अनंत निकम, कैलास पाटील, ज्ञानेश्वर पाटील यांनी २६ रोजी सकाळी स्वतःला मातीत गाडून घेतले. तहसीलदार व तालुका कृषी अधिकारी यांनी दोन आठवड्यात शेड नेट घोटाळ्याची चौकशी करून गुन्हे दाखल केले जातील, असे आश्वासन दिल्याने आंदोलन मागे घेण्यात आले.
