जळगाव शहरातील घटना
जळगाव (प्रतिनिधी) : शेअर मार्केटमध्ये गुंतवणूक केल्यास जास्तीचा नफा मिळवून देऊ, असे आमिष दाखवून रेल्वेच्या सेवानिवृत्त कर्मचाऱ्याला ५३ लाख ६५ हजार रुपयांचा ऑनलाइन गंडा घालण्यात आल्याचा प्रकार उघडकीस आला आहे. यासंदर्भात गुरुवारी सायबर पोलिसात फसवणुकीचा गुन्हा दाखल झाला आहे.
जळगाव शहरात वास्तव्यास असलेले रेल्वेचे निवृत्त कर्मचारी यांना दिनांक१० जून रोजी रात्री एक फोन आला. अमित मालवीय, आदित्य जैन, विजय कुमार असे नाव सांगणाऱ्या तिघांनी तुम्ही आमच्या रेझ पिरॅमिड एलिट प्रकल्प योजनेत अर्थात शेअर बँक खात्यातून मार्केटमध्ये ऑनलाइन गुंतवणूक केली तर तुम्हाला जास्तीचा नफा मिळवून देऊ, असे सांगितले. त्यानुसार संबंधित सेवानिवृत्त कर्मचाऱ्याने १० जून २०२४ ते ३१ जुलै २०२४ या कालावधीत केरळ, दिल्ली, बंगळुरू, गुवाहाटी या राज्यांतील १२ बँक खात्यांत ५३ लाख ६५ हजार रुपये जमा केले. त्यातून त्यांना ८३ लाख रुपये नफा झाल्याचे दाखविण्यात आले.
ही रक्कम काढायला गेल्यावर जीएसटीचे ५ टक्के, आयकराचे दहा टक्के रक्कम भरावी लागेल, असे सांगण्यात आले. रक्कम काढता येत नसल्याने संबंधित कर्मचाऱ्याला संशय आला. त्यांनी सायबर पोलिस ठाणे गाठून संपूर्ण घटनाक्रम सांगितला. पोलिसांनी केलेल्या चौकशीत ही नफ्याची रक्कम डिजिटल अॅप्लिकेशनवर दिसत होती.
प्रत्यक्ष बँक खात्यात जमा झालेलीच नव्हती. हा फसवणुकीचा प्रकार असल्याचे उघड झाले. सायबर गुन्हेगार हे व्हॉटस्अॅप, टेलिग्रामवरच्या नऊ नंबरवरून बोलत होते. हे सर्व नंबरही फेक असल्याचे उघड झाले. संबंधित कर्मचारी नाशिक येथे रेल्वेत नोकरीला होते. सेवानिवृत्तीची रक्कम त्यांनी बँकेत ठेवली होती.
