जळगाव तालुक्यातील करंज येथील घटना
जळगाव ( प्रतिनिधी ) – तालुक्यातील करंज गावात राहणारे ४३ वर्षीय व्यक्तीला घराजवळ सर्पदंश झाल्याने त्यांच्यावर शासकीय वैद्यकीय महाविद्यालयात उपचार सुरू असताना मृत्यू झाल्याची घटना समोर आली आहे. याप्रकरणी सायंकाळी ६ वाजता जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
सुधाकर शामराव सपकाळे (वय ४३ रा. करंज ता. जळगाव) असे मयत व्यक्तीचे नाव आहे. जळगाव तालुक्यातील करंज गावात सुधाकर सपकाळे हे आपल्या कुटुंबियांसह वास्तव्याला होते. त्यांना घराजवळ सापाने चावा घेतला. त्यामुळे त्यांना तातडीने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले. त्यांच्यावर उपचार सुरू असतांना दुपारी ४ वाजता त्यांचा मृत्यू झाला. यावेळी रूग्णालयात नातेवाईकांनी एकच आक्रोश केला. यावेळी जळगाव तालुका पोलीस ठाण्यात अकस्मात मृत्यूची नोंद करण्यात आली. पुढील तपास पोहेकॉ योगेश पाटील हे करीत आहे.
