पाचोरा शहरातील घटना
पाचोरा (प्रतिनिधी) :- शहरातील देशमुखवाडी येथे २५ वर्षीय तरुणाचा सर्पदंशाने मृत्यू झाल्याची घटना घडली आहे. या घटनेप्रकरणी पाचोरा पोलिस स्टेशनमध्ये अकस्मात मृत्यूची नोंद करण्यात आली आहे.
देशमुखवाडी येथील रहिवाशी निखिल चंद्रकांत पाटील (२५) हे दुपारच्या सुमारास लघुशंकेसाठी जात असताना त्याला सर्पाने दंश केला. दरम्यान निखिल यास तात्काळ पाचोरा ग्रामीण रुग्णालयात दाखल केले असता डॉक्टरांनी निखिल यास मृत घोषित केले. घटनेप्रकरणी पाचोरा पोलिस ठाण्यात अकस्मात मृत्यूची नोंद करण्यात आली असून घटनेचा पुढील तपास पोलिस हेड कॉन्स्टेबल सचिन निकम हे करीत आहे. निखिल याचे पश्चात आई, वडील, एक भाऊ, एक विवाहित बहिण असा परिवार आहे. निखिल याचे अकस्मात मृत्यूने देशमुखवाडी परिसरात शोककळा पसरली आहे.
