जळगाव तालुक्यातील खेडी येथील घटना
जळगाव (प्रतिनिधी) : शहरापासून जवळ असलेल्या खेडी गावातील ५२ वर्षीय रिक्षाचालकानी राहत्या घरात गळफास घेऊन आत्महत्या केल्याची घटना गुरुवारी दि. ३० मे रोजी सायंकाळी ५.३० वाजता घडली आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
गोकुळ दंगल पाटील (वय-५२, रा.खेडी ता. जळगाव) असे मयत रिक्षाचालकाचे नाव आहे. गोकुळ पाटील हे पत्नी आणि मुलगासह राहतात. रिक्षा चालवून ते उदरनिर्वाह करत होते. दरम्यान गुरुवारी दि. ३० मे रोजी त्यांची पत्नी आणि मुलगा कामावर होते. त्यामुळे ते घरी एकटे असताना त्यांनी राहत्या घरात गळफास घेऊन आत्महत्या केली. सायंकाळी त्यांची पत्नी उषाबाई आणि मुलगा मिलिंद हे घरी आले, तेव्हा हा प्रकार उघडकीला आला. त्यावेळी शेजारी राहणाऱ्या ग्रामस्थांनी धाव घेऊन त्यांना शासकीय वैद्यकीय महाविद्यालयात दाखल केले.
वैद्यकीय अधिकारी यांनी तपासणी अंती मयत घोषित केले. त्यांच्या आत्महत्येचे कारण समोर आलेले नाही. याबाबत एमआयडीसी पोलिसात अकस्मात मृत्यूची नोंद घेण्याचे काम सुरू होते.
