पोलिसांनी आवळल्या दुचाकी चोराच्या मुसक्या : मध्यप्रदेशातून अटक
रावेर गुन्हे शोध पथकाची कामगिरी
रावेर प्रतिनिधी :
येथील रावेर पोलिस ठाण्यात दाखल झालेल्या एका दुचाकी चोरीच्या गुन्ह्याचा तपास करत असताना, रावेर गुन्हे शोध पथकाने एका सराईत दुचाकी चोराला मध्यप्रदेशमधून अटक केली आहे. या आरोपीकडून चोरीला गेलेली दुचाकीही हस्तगत करण्यात पोलिसांना यश आले आहे.
१८ ऑगस्ट २०२५ रोजी पंकज शिवनाथ मशाने (रा. उटखेडा रोड, रावेर) यांनी त्यांची होंडा कंपनीची मोटारसायकल (क्र. एमएच-१८-सीएम-३६६७) रावेर येथील एच.डी.एफ.सी. बँकेबाहेर नेहमीप्रमाणे उभी केली होती.(केसीएन)सकाळी ९.०० वाजता ते बँकेत कामासाठी गेले असता, दुपारी १.०० वाजेच्या सुमारास अज्ञात चोरट्याने गाडीचे लॉक तोडून दुचाकी चोरून नेली. याप्रकरणी रावेर पोलिस ठाण्यात गुन्हा (क्र. ३५९/२०२५) दाखल करण्यात आला होता.
गुन्हा दाखल होताच, रावेर गुन्हे शोध पथकाने बँकेबाहेरील सीसीटीव्ही फुटेज तपासले. त्यात एक व्यक्ती दुचाकीचे लॉक तोडून ती चोरून नेत असल्याचे दिसून आले. आरोपीचा शोध घेण्यासाठी पोलिसांनी रावेर शहर, पाल, आणि खानापूर येथील ३५ हून अधिक सीसीटीव्ही फुटेज तपासले, परंतु आरोपीची ओळख पटत नव्हती.
सततच्या प्रयत्नांनंतरही कोणताही सुगावा लागत नसल्याने, पोलिस निरीक्षक विशाल जयस्वाल यांनी पुन्हा एकदा तपासाला सुरुवात केली. त्यांनी सीसीटीव्ही फुटेजमधील आरोपीच्या पेहरावावरून तो पालजवळील दुर्गम भागातील असावा असा अंदाज व्यक्त केला.(केसीएन)त्यांच्या या अंदाजानुसार शोध पथकाने तपास सुरू ठेवला आणि अखेर आरोपीची ओळख पटली. आरोपीचे नाव लाला कारसिंग तडोले (वय ३२, रा. जनकपुरा, बोरीबुर्जग, जि. बुरहानपूर, मध्य प्रदेश) असे निष्पन्न झाले. पोलिसांनी आरोपीला ताब्यात घेऊन त्याच्याकडून चोरीला गेलेली दुचाकी जप्त केली.
या आरोपीला न्यायालयात हजर केले असून, त्याला पोलिस कोठडीची मागणी करण्यात आली आहे. या आरोपीकडून आणखी काही गुन्हे उघडकीस येण्याची शक्यता पोलिसांनी वर्तवली आहे.(केसीएन)ही कामगिरी जळगाव जिल्ह्याचे पोलिस अधीक्षक डॉ. महेश्वर रेड्डी, अपर पोलिस अधीक्षक अशोक नखाते आणि पोलिस उपअधीक्षक अनिल बडगुजर यांच्या मार्गदर्शनाखाली करण्यात आली. यामध्ये पोलिस निरीक्षक डॉ. विशाल जयस्वाल यांच्या नेतृत्वाखालील गुन्हे शोध पथकातील पो.हे.कॉ. ईश्वर चव्हाण, पो.ना. कल्पेश आमोदकर, पो.शि. श्रीकांत चव्हाण, प्रमोद पाटील, विशाल पाटील, सुकेश तडवी तसेच सायबर पोलिस स्टेशनचे मिलिंद जाधव आणि गौरव पाटील यांनी महत्त्वाची भूमिका बजावली. या गुन्ह्याचा पुढील तपास पो.हे.कॉ. किशोर सपकाळे करत आहेत
