सामाजिक कार्यकर्त्यांचा ‘नाभिक हिरकणी’, ‘जिवाजी महाले नाभिक रत्न’ पुरस्काराने गौरव
चंद्रकांत कोळी
रावेर (प्रतिनिधी) :- अ.भा. जिवा सेनेच्या वतीने नुकताच रावेर येथील मंगलम लॉन्समध्ये गुणवंत विद्यार्थ्यांचा गौरव सोहळा मोठ्या उत्साहात साजरा करण्यात आला. या कार्यक्रमात विद्यार्थ्यांना प्रमाणपत्रे आणि सन्मानचिन्हे देऊन गौरविण्यात आले. सोबतच, समाजासाठी उत्कृष्ट कार्य करणाऱ्या व्यक्तींना मानाचा ‘नाभिक हिरकणी पुरस्कार’ आणि ‘जिवाजी महाले नाभिक रत्न पुरस्कार’ प्रदान करण्यात आला.
कार्यक्रमाची सुरुवात संत सेना महाराज, शूरवीर जिवाजी महाले, माता सरस्वती, आणि छत्रपती शिवाजी महाराज यांच्या प्रतिमांना पुष्पहार अर्पण करून आणि दीपप्रज्वलन करून करण्यात आली. या कार्यक्रमाचे अध्यक्षस्थान अ.भा. जिवा सेनेचे प्रदेशाध्यक्ष दिनेश महाले यांनी भूषविले. मंचावर अनेक मान्यवर उपस्थित होते, ज्यात युवक प्रदेशाध्यक्ष देविदास फुलपगारे, उत्तर महाराष्ट्र युवक अध्यक्ष गणेश सेठी, उत्तर महाराष्ट्र तंटामुक्ती अध्यक्ष सुरेश ठाकरे, उद्योजक सुधाकर सनांसे, आणि इतरांचा समावेश होता.
यावेळी बोलताना अनेक मान्यवरांनी विद्यार्थ्यांना आणि तरुणांना मोलाचे मार्गदर्शन केले. विद्यार्थ्यांनी आई-वडिलांच्या कष्टाचे मोल लक्षात ठेवून अधिकारी होण्याचे स्वप्न पाहावे, असे आवाहन करण्यात आले. तसेच, तरुणांनी व्यसनापासून दूर राहून आपल्या पारंपारिक व्यवसायात लक्ष घालावे, असा सल्लाही देण्यात आला. समाजाची ताकद वाढवण्यासाठी सर्व संघटनांनी एकत्र येऊन काम करावे आणि विचारांमध्ये मतभेद असले तरी मनभेद नसावेत, यावरही भर देण्यात आला. समाजासाठी महत्त्वपूर्ण योगदान दिल्याबद्दल किन्ही येथील सरपंच नीलिमा सचिन सोनवणे यांना ‘नाभिक हिरकणी पुरस्कार’ प्रदान करण्यात आला. त्याचप्रमाणे, डॉ. अमोल ज्ञानदेव बानाईत यांना ‘शूरवीर जिवाजी महाले नाभिक रत्न पुरस्कार’ देऊन सन्मानित करण्यात आले.
कार्यक्रमाच्या यशस्वीतेसाठी रावेर तालुक्यातील सर्व पदाधिकारी, कार्यकर्ते आणि नाभिक समाज बांधवांनी विशेष परिश्रम घेतले. सूत्रसंचालन योगेश आमोदकर आणि काजल मानकरे यांनी केले, तर आभारप्रदर्शन धनराज बोरनारे यांनी केले. या कार्यक्रमाला अहीरवाडी, मोठे वाघोदे, निंभोरा, खिर्डी, सावदा शहर, आणि रावेर शहरातील कार्यकर्त्यांनी विशेष मेहनत घेतली.
