अळंदीत नेऊन जबरदस्तीने थाटले लग्न, नकार दिला म्हणून अश्लील व्हिडिओची धमकी देत अत्याचार
रावेर पोलीस स्टेशनमध्ये १० जणांवर गुन्हा दाखल!
रावेर(प्रतिनिधी):- रावेर शहरातील एका कॉलेजच्या गेटवरून एका २२ वर्षीय विद्यार्थिनीचे अपहरण करून तिच्यावर अत्याचार केल्याची एक अत्यंत संतापजनक आणि थरारक घटना उघडकीस आली आहे. पीडित तरुणीला गुंगीचे औषध देऊन आधी तिचे जबरदस्तीने लग्न लावून देण्यात आले आणि त्यानंतर पुण्यात एका खोलीत डांबून ठेवून तिच्या इच्छेविरुद्ध शारीरिक संबंध प्रस्थापित करण्यात आले. या भयानक गुन्ह्यामध्ये मुख्य संशयितासह त्याच्या कुटुंबातील महिला आणि इतर साथीदारांनी संगनमत केले असून, रावेर पोलीस ठाण्यात १० जणांवर सामूहिक कट रचून बलात्कार केल्याप्रकरणी गुन्हा दाखल करण्यात आला आहे.
पोलीस सूत्रांनी दिलेल्या प्राथमिक माहितीनुसार, २२ वर्षीय पीडित तरुणी ही ११ मे २०२६ रोजी सकाळी ८ वाजेच्या सुमारास व्ही. एस. नाईक कॉलेजकडे पायी जात होती. त्याच वेळी मुख्य संशयित आदित्य राजू महाजन (रा. रसलपूर, ता. रावेर) हा तिथे आला आणि “तुझ्याशी काम आहे, जरा माझ्यासोबत चल,” असे म्हणून त्याने तिला जबरदस्तीने आपल्या बाईकवर बसवले. तिथून तो तिला बऱ्हाणपूर रोडवरील शहापूर फाट्यावरून हटणूर गावाजवळ घेऊन गेला. तिथे आधीच पांढऱ्या रंगाची कार घेऊन त्याचे इतर नातेवाईक दबा धरून बसले होते. संशयितांनी पीडित तरुणीला बळजबरीने कारमध्ये बसवले आणि बिसलेरी पाण्याच्या बाटलीत गुंगीचे औषध टाकून ते पाणी तिला पिण्यास दिले.
अळंदीत बळजबरीने लग्न, पुण्यात नेऊन अत्याचार
गुंगीचे औषध पोटात गेल्यामुळे तरुणीला चक्कर आली आणि ती अर्धवट शुद्धीत असताना संशयितांनी तिला थेट पुणे जिल्ह्यातील अळंदी येथे आणले. तरुणी पूर्ण शुद्धीत नसताना मुख्य संशयित आदित्य महाजन याने तिच्याशी बळजबरीने लग्न केले. या बनावट लग्नाचे साक्षीदार म्हणून त्याच्या काही अनोळखी मित्रांनी कागदपत्रांवर स्वाक्षऱ्या केल्या. यानंतर आदित्यने तिला पुण्यातील एका खोलीत डांबून ठेवले. तिथे तिच्यावर जबरदस्तीने शारीरिक संबंध ठेवण्याचा प्रयत्न केला असता तरुणीने कडाडून विरोध केला. मात्र, “तुझे फोटो आणि व्हिडिओ सोशल मीडियावर व्हायरल करेन आणि तुझ्या नातेवाईकांना पाठवेन,” अशी धमकी देत आदित्यने तिच्या इच्छेविरुद्ध वेळोवेळी अत्याचार केले. या संपूर्ण काळात संशयिताचा मावस भाऊ तिला जेवणाचे डबे आणून देऊन या गुन्ह्यात मदत करत होता.
१० संशयितांविरुद्ध गुन्हा नोंद, तपास सुरू
या छळातून सुटका झाल्यानंतर पीडित तरुणीने रावेर पोलीस ठाण्यात धाव घेऊन आपली आपबिती सांगितली. तिच्या फिर्यादीवरून २६ मे २०२६ रोजी मध्यरात्री ३:०२ वाजता पोलिसांनी गुन्हा रजि. नं. २५१/२०२६ अन्वये भारतीय न्याय संहिता (BNS) कलम ६४(१), ६४(२)(M) (बलात्कार), १२३ (गुंगीचे औषध देणे), ८७, ३५१(२)(३) आणि ३(५) प्रमाणे मुख्य आरोपी आदित्य महाजन, राजू महाजन, हरीदास महाजन, दिनकर महाजन, गणेश महाजन, रुपेश महाजन, निकिता महाजन (सर्व रा. रसलपूर, रावेर), आदित्यचा मावस भाऊ (शिक्षक, रा. विरोदा, मध्य प्रदेश), एक कार चालक आणि लग्न लावून देणारा मित्र अशा एकूण १० जणांवर गुन्हा दाखल केला आहे. पोलीस उपनिरीक्षक मनोज जनार्दन महाजन यांच्या मार्गदर्शनाखाली रावेर पोलीस या गंभीर प्रकरणाचा पुढील सखोल तपास करत आहेत.
