जळगाव (प्रतिनिधी) :- तालुक्यात रामदेववाडी शिवारात दोन दुचाकींची समोरासमोर धडक होऊन झालेल्या अपघातात एका तरुणाचा मृत्यू झाला आहे. या प्रकरणी एमआयडीसी पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ज्ञानेश्वर चंद्रकांत सोनवणे (वय २७, रा. नागदुली, ता. एरंडोल, जि. जळगाव) हे १२ मे २०२६ रोजी रात्री अकराच्या सुमारास आपल्या दुचाकीने रामदेववाडी शिवारातील जंगल भागातून जात होते.
यावेळी शुभम रविंद्र पाटील (रा. जवखेडा, ता. जि. जळगाव) हा एमएच १९ ईएम ३२१९ क्रमांकाची बजाज प्लॅटिना दुचाकी भरधाव वेगात चालवत होता. रस्त्याच्या परिस्थितीकडे दुर्लक्ष करून त्याने समोरून येणाऱ्या ज्ञानेश्वर सोनवणे यांच्या दुचाकीला जोरदार धडक दिली.
या भीषण अपघातात ज्ञानेश्वर सोनवणे गंभीर जखमी झाले. त्यांना उपचारासाठी रुग्णालयात दाखल करण्यात आले मात्र उपचारादरम्यान त्यांचा मृत्यू झाला. अपघातात दोन्ही दुचाकींचेही नुकसान झाले आहे.
या प्रकरणी महेंद्र तुकाराम सोनवणे (वय ४७, रा. नागदुली, ता. एरंडोल, जि. जळगाव) यांनी फिर्याद दिली आहे. त्यानुसार भारतीय न्याय संहिता २०२३ अंतर्गत कलम १०६(१), २८१, १२५(अ)(ब), ३२४(४) तसेच मोटार वाहन कायदा कलम १८४ अन्वये गुन्हा दाखल करण्यात आला आहे. पुढील तपास एमआयडीसी पोलिस करीत आहेत.
