अमेरिकेतील दाम्पत्यासह देशातील चाळीसगावकर येणार मतदानाला
चाळीसगाव (प्रतिनिधी) : ‘बदलत्या चाळीसगाव’चे साक्षीदार बनण्यासाठी आणि गेल्या पाच वर्षांत झालेला विकास आणि चाळीसगावचे पालटलेले रूप बघण्यासाठी राज्यातील, देशभरातीलच नव्हे तर जगभरातील चाळीसगावकरांनी मतदानाला उपस्थित राहून या बदलाचे साक्षीदार बनावे, असे आवाहन भाजप महायुतीचे उमेदवार – आमदार मंगेश चव्हाण यांनी केले होते. त्यांच्या या आवाहनाला जगभरातील चाळीसगावकरांनी उत्स्फूर्त प्रतिसाद दिला आहे.
कामानिमित्त वेगवेगळ्या देशांत राहत असलेल्या अनेक चाळीसगावकरांनी फोन, मेसेज, सोशल मीडियावर अशा अनेक माध्यमांतून आपल्या प्रतिक्रिया कळवल्या आहेत आणि आ. मंगेश चव्हाण यांच्या ‘विकासाच्या व्हिजन’ला पाठिंबा दिला आहे. अमेरिका येथे राहत असलेल्या येवले दाम्पत्याने एक व्हिडिओ प्रसारित करून आमदार मंगेश चव्हाण यांच्या विकासरथाला सहकार्य करण्यासाठी व एक मत, एक दिवस मातृभूमीसाठी या आवाहनाला प्रतिसाद देत अमेरिकेतून मतदानासाठी चाळीसगाव येथे येणार असल्याचे सांगितले.
देशातील विविध भागांमध्ये राज्यातील विविध शहरांमध्ये व्यवसाय, शिक्षण, नोकरीनिमित्त असलेल्या शेकडो चाळीसगावकरांनीदेखील मीडियावर किंवा अनेक माध्यमांतून आमदार चव्हाण यांच्या आवाहनाला प्रतिसाद देत चाळीसगाव येथे मतदानासाठी येणार असल्याचे सांगितले.
आ. चव्हाण यांनी चाळीसगाव मतदारसंघात सर्वदूर विकासकामांचा सपाटा लावला असून लवकरच चाळीसगाव हे विकासाचं रोल मॉडेल म्हणून नावलौकिक प्राप्त करेल म्हणून चाळीसगाव तालुक्याच्या बाहेर राहणाऱ्या सर्व चाळीसगावकरांनी मतदानाला उपस्थित राहून लोकशाही बळकट करण्यासाठी मतदानाचा हक्क बजावला पाहिजे आणि यानिमित्ताने चाळीसगावचे बदललेले रूपदेखील आपण सगळ्यांनी बघावं व पुढेदेखील अशाच प्रकारे विकासकामं करण्यासाठी बळ द्यावं, असे आवाहन आमदार चव्हाण यांनी केले.
