पुण्यातील हडपसर परिसरातील घटना
पुणे – : एका तेरा वर्षीय अल्पवयीन मुलीवर तिचा बाप , चुलता आणि भाऊ यांनी बलात्कार केल्याची धक्कादायक घटना हडपसर परिसरातील मांजरी येथे घडली असून याप्रकरणी पोलिसांत गुन्हा दाखल करण्यात आला आहे. हा प्रकार जुलै 2022 ते 10 जून 2024 या कालावधी दरम्यान घडला. पीडित मुलीने या संदर्भात आईकडे तक्रार केल्यानंतर हा सर्व प्रकार उघड झाला.
सूत्रांनी दिलेल्या माहितीनुसार पीडित मुलगीकुटुंबासह मांजरी परिसरात राहायला आहे. जुलै 2022 मध्ये तिच्या चुलत भावाने राहत्या घरामध्ये वरच्या खोलीत तिला एकटे असल्याचा फायदा घेऊन लोखंडी रॉडचा धाक दाखवत तिच्यावर बलात्कार केला. त्रास झाल्यामुळे तिने आरडाओरडा सुरू केला. स्वतःची कशीबशी सुटका करून घेतली. ती तिथून पळाली. त्याने तिला ही गोष्ट कोणाला सांगितल्यास ‘ठार मारून टाकीन’ अशी धमकी दिली होती.
त्यानंतर जानेवारी 2024 मध्ये एके रात्री फिर्यादी मुलगी घरामध्ये झोपलेली होती. त्यावेळी तिचा चुलता त्या ठिकाणी आला. तिच्या अंथरुणामध्ये शिरून त्याने तिचे कपडे काढून तिच्यावर बलात्कार केला. त्यानंतर काही दिवसांनी या मुलीची आई गावी गेलेली असतांना तिच्या वडिलांनी जबरदस्तीने तिचे चुंबन घेतले आणि तिच्यावर देखील बलात्कार करण्याचा प्रयत्न केला. पीडित मुलीने वडिलांना विरोध केला असता तयाने तिला मारहाण केल्याचे फिर्यादीमध्ये म्हटले आहे. अशा प्रकारे वडील तिला दररोज त्रास देत असल्याचे देखील पीडित मुलीने पोलिसांना सांगितले आहे. याप्रकरणी हडपसर पोलीस स्टेशनला भादंवि 376, 376 (आय), 323, 506, बाललैंगिक अत्याचार प्रतिबंधक कायदा कलम 4, 6, 8, 12 अन्वये गुन्हा दाखल केला आहे.
