नागपूर ( वृत्तसंस्था ) – शहरात एका तरुणीनं सामुहिक बलात्कार झाल्याची तक्रार पोलिसांत दिली. पोलीस आयुक्त अमितेश कुमार आणि इतर अधिकाऱ्यांसह तब्बल १ हजारहून अधिक पोलीस कर्मचारी तपास करत होते. मात्र तपासाअंती समोर आलेल्या माहितीनं पोलीसही चक्रावले.प्रियकराशी लग्नासाठी हा बनाव केल्याचे नंतर फिर्यादीने सांगितले !
सोमवारी सकाळी तरुणीने सामुहिक बलात्काराची तक्रार कळमना पोलीस ठाण्यात दाखल केली. पोलिसांनी तपास सुरू केला. शहरभरातील २५० हून अधिक सीसीटीव्ही फुटेज स्कॅन केल्यानंतर तरुणीने बलात्काराची बनावट कथा रचली होती, या निष्कर्षापर्यंत पोलीस पोहोचले.
“चिखली परिसरात निर्जन ठिकाणी दोन नराधमांनी बलात्कार केल्याचा आरोप महिलेने केला होता. तरुणी सकाळी रामदासपेठ परिसरात म्युझिक क्लासला जात होती. त्यावेळी दोन आरोपी पांढऱ्या रंगाच्या व्हॅनमध्ये आले आणि त्यांना बुटीबोरीचा रस्ता विचारला. नंतर त्यांनी जबरदस्तीने तरुणीला व्हॅनमध्ये खेचले आणि तोंड कापडाने झाकले. आरोपींनी निर्जन स्थळी नेत बलात्कार केला,” अशी तक्रार तरुणीने दिल्याचं पोलिसांनी सांगितलं.
पोलीस आयुक्त अमितेश कुमार, अतिरिक्त पोलीस आयुक्त सुनील फुलारी व इतर वरिष्ठ अधिकारी तपास करण्यासाठी सीताबर्डी पोलीस ठाण्यात पोहोचले.
शहरातील सीसीटीव्ही फुटेज, व्हॅन वाहनांची तपासणी करण्यासाठी आणि तरुणीच्या मित्रांची चौकशी करण्यासाठी तब्बल १ हजारहून अधिक पोलीस कर्मचार्‍यांची ४० पथके तयार करण्यात आली होती. सीसीटीव्ही फुटेजवरून आढळून आले की महिला सकाळी ९:५० वाजता व्हेरायटी चौकात बसमधून खाली उतरली, सकाळी १० वाजता झाशी राणी चौकाकडे चालत गेली, १०.१५ वाजता तिने आनंद टॉकीज चौकातून ऑटो रिक्षा पकडली. आणि सकाळी १०.२५ ला मेयो हॉस्पिटलमध्ये उतरली. यानंतर ती दुसरी ऑटो रिक्षा घेऊन सकाळी १०.५४ वाजता चिखली चौकात उतरली. पेट्रोल पंपावर बसवण्यात आलेल्या सीसीटीव्ही कॅमेऱ्यात ही महिला सकाळी ११.०४ वाजता कळमना पोलीस स्टेशनच्या दिशेने चालत येताना दिसली .
तरुणीला वैद्यकीय तपासणीसाठी मेयो रुग्णालयात पाठवण्यात आले. सहा तासांहून अधिक वेळ तपास आणि ५० हून अधिक लोकांची चौकशी केल्यानंतर पोलीस या निष्कर्षावर पोहोचले की या तरुणीने सामूहिक बलात्काराची कथा रचली होती. पोलिसांनी तिची चौकशी केली असता तिने प्रियकराशी लग्न करण्यासाठी हा बनाव रचल्याची कबुली दिली.
