जळगावात वैद्यकीय अहवालानुसार कारवाई
जळगाव (प्रतिनिधी) : प्रसूतीवेळी हलगर्जीपणा व निष्काळजीपणा केल्यामुळे गरोदर महिलेचा मृत्यू झाल्याप्रकरणी डॉ. तिलोत्तमा गाजरे यांच्याविरुद्ध जिल्हापेठ पोलिस ठाण्यात गुन्हा दाखल करण्यात आला आहे. वैद्यकीय अहवाल आल्यानंतर त्यानुसार हा गुन्हा दाखल झाला आहे.
पूजा जयप्रकाश विश्वकर्मा (२९, रा. श्रीकृष्ण कॉलनी) असे मयत महिलेचे नाव आहे. पूजा विश्वकर्मा यांना प्रसूतीसाठी पोलिस अधीक्षक कार्यालयासमोरील गाजरे हॉस्पिटल येथे दाखल करण्यात आले होते. २१ जानेवारी २०२२ ते २२ जानेवारी २०२२ दरम्यान प्रसूती वेळी व प्रसूतीनंतर अतिरक्तस्राव झाला. त्यानंतर या महिलेचा मृत्यू झाला न होता.
यासंदर्भात मयत महिलेच्या कुटुंबीयांनी डॉक्टरांवर गुन्हा दाखल करण्यासाठी लेखी तक्रार दिली होती. त्या तक्रारीची दखल घेत वैद्यकीय समितीसमक्ष मृतदेहाचे शवविच्छेदन करण्यात आले होते. मृत्यूचे नेमके कारण शोधण्यासाठी तज्ज्ञ डॉक्टरांच्या पथकाने दिलेल्या अहवालानुसार उपचारात हलगर्जीपणा केल्याचा ठपका ठेवण्यात आला.
वैद्यकीय अहवाल आणि चौकशीअंती याप्रकरणी मयत विवाहितेचे पती जयप्रकाश जियालाल विश्वकर्मा (३४) यांच्या फिर्यादीवरून जिल्हापेठ पोलिस ठाण्यात गुन्हा दाखल करण्यात आला आहे. पुढील तपास सहायक पोलिस निरीक्षक मीरा देशमुख करीत आहेत.
