खा. स्मिता वाघ यांची उपस्थिती, प्रचार रॅलीस उत्स्फूर्त प्रतिसाद
जळगाव (प्रतिनिधी) : जळगाव शहर महानगरपालिका निवडणुकीच्या पार्श्वभूमीवर राजकीय वातावरण तापू लागले आहे. आज दि. ८ जानेवारी रोजी प्रभाग क्रमांक १६ मधील भारतीय जनता पक्षाच्या चारही उमेदवारांच्या प्रचारार्थ काढण्यात आलेल्या भव्य रॅलीला मतदारांचा प्रचंड प्रतिसाद मिळाला. यावेळी खा. स्मिता वाघ यांची उपस्थिती होती. काशिनाथ लॉजपासून सुरू झालेली ही रॅली प्रभागातील विविध भागांतून फिरत असताना मतदारांमध्ये मोठा उत्साह दिसून आला.
प्रभाग १६ मधील भाजपचे अधिकृत उमेदवार डॉ. विश्वनाथ खडके (१६ अ), वंदना संतोष इंगळे (१६ ब), रंजना विजय वानखेडे (१६ क), सुनील वामनराव खडके (१६ ड) या चारही उमेदवारांनी प्रत्यक्ष घराघरात जाऊन मतदारांच्या भेटी घेतल्या आणि प्रभागाच्या विकासाचे व्हिजन मांडले. सकाळी ८ वाजता हॉटेल इंपिरिया येथून रॅलीला सुरुवात झाली. त्यानंतर गुरुकुल, अपनाघर कॉलनी, दिलीप काका यांचे निवासस्थान, रेमंड कॉलनी, संतोषभाऊ इंगळे यांचे निवासस्थान, धनुशकु मेडिकल परिसर आणि एम.एस.ई.बी. कार्यालय या मार्गाने रॅली मार्गस्थ झाली. रॅलीचा समारोप आर.टी.ओ. जवळील अपनाघर येथील हनुमान मंदिरात करण्यात आला.
प्रचारादरम्यान ठिकठिकाणी उमेदवारांचे औक्षण करून स्वागत करण्यात आले. “प्रभागातील मूलभूत सुविधा, रस्ते आणि पाण्याचा प्रश्न मार्गी लावण्यासाठी आम्ही कटिबद्ध आहोत,” असा विश्वास उमेदवारांनी यावेळी व्यक्त केला. या रॅलीचे नियोजन भाजप मंडळ ४ चे सरचिटणीस किसन भगवान मराठे यांनी केले होते. रॅलीमध्ये भाजपचे अनेक पदाधिकारी, कार्यकर्ते आणि प्रभागातील नागरिक मोठ्या संख्येने सहभागी झाले होते. हनुमान मंदिरात सामूहिक आरती करून आणि विजयाचा संकल्प सोडून रॅलीची सांगता झाली.
