जळगाव एलसीबीची राजस्थानच्या वाळवंटात मोठी कारवाई
जळगाव ( प्रतिनिधी ) – डिझेलची चोरी करून अपघाताचा बनाव रचणाऱ्या एका आंतरराज्यीय टोळीचा जळगाव स्थानिक गुन्हे शाखेने पर्दाफाश केला आहे. या कारवाईसाठी पोलिसांनी तब्बल २७०० किलोमीटरचा प्रवास करत थेट राजस्थानच्या वाळवंटातून आरोपीला अटक केली आहे.
एरंडोल-पारोळा रोडवरील ‘हॉटेल आनंद’ परिसरात १६ जानेवारी २०२६ रोजी ही घटना घडली होती. टँकर चालक भुराराम काळुराम याने आपल्या साथीदारांच्या मदतीने २२ लाख रुपये किमतीचे ३०,००० लिटर डिझेल चोरले होते. ही चोरी लपवण्यासाठी आरोपींनी टँकरचा अपघात झाल्याचा बनाव रचून पोलिसांची दिशाभूल करण्याचा प्रयत्न केला होता. याप्रकरणी एरंडोल पोलीस ठाण्यात गुन्हा दाखल करण्यात आला होता. गुन्ह्याचे गांभीर्य ओळखून पोलीस अधीक्षक महेश्वर रेड्डी यांनी एलसीबीला समांतर तपासाचे आदेश दिले होते. तांत्रिक विश्लेषणाच्या आधारे आरोपींचे लोकेशन राजस्थानमधील बाडमेर येथे असल्याचे निष्पन्न झाले.
बाडमेर येथे पोलिसांची चाहूल लागताच मुख्य आरोपी भुराराम काळुराम याने आपली पांढऱ्या रंगाची स्विफ्ट कार (क्र. जिजे-०२-सिजी-०३३९) सोडून पळ काढला. पोलिसांनी ही कार जप्त केली आहे. त्यानंतर पथकाने राजस्थानच्या अतिदुर्गम वाळवंटी भागातील ‘होडु’ येथे छापा टाकला. तेथून असला राम भोमाराम (वय ३२) याला शिताफीने अटक करण्यात आली. आरोपींनी कट रचून पुरावा नष्ट करण्याचा प्रयत्न केल्यामुळे आता या गुन्ह्यात नवीन कलमे वाढवण्यात येणार आहेत.
यात प्रामुख्याने गुन्हेगारी कट (कलम ६१-२), वाहतूक साधनातून चोरी (कलम ३०३-२) आणि पुरावा नष्ट करणे (कलम २३८) या कलमांचा समावेश असेल. अटक केलेल्या आरोपीला न्यायालयात हजर केले असता, प्रकरणाचे गांभीर्य लक्षात घेऊन न्यायालयाने त्याला ०७ दिवसांची पोलीस कोठडी सुनावली आहे. ही यशस्वी कामगिरी पोलीस अधीक्षक महेश्वर रेड्डी, अपर पोलीस अधीक्षक कविता नेरकर, एलसीबीचे वरिष्ठ पोलीस निरीक्षक राहुल गायकवाड, उपनिरीक्षक जितेंद्र वल्टे, संदीप पाटील, हरिलाल पाटील, प्रवीण मांडोळे, राहुल कोळी, दीपक चौधरी, गौरव पाटील, मिलिंद जाधव आणि त्यांच्या पथकाने केली आहे.
