भडगाव पोलीस स्टेशन येथील घटना
भडगाव (प्रतिनिधी) – येथील २ गुंडांनी चक्क पोलीस ठाण्यात जाऊन एका पोलिसाला धमकी देत त्याची सरकारी वर्दी फाडून चापटाबुक्क्यांनी मारहाण केली. तसेच जातीवाचक शिवीगाळ करून जीवे ठार मारण्याची धमकी दिली. याबाबत भडगाव पोलीस स्टेशनला दोघांविरुद्ध गुन्हा दाखल करण्यात येऊन अटक करण्यात आली आहे.
विठ्ठल उर्फ भावेश भगवान पाटील व सागर विठ्ठल पाटील असे भडगाव येथे राहणाऱ्या आणि गुन्हा दाखल झालेल्या दोघांची नावे आहेत. जखमी पो.हे.कॉ. विजय धर्मा जाधव हे भडगाव पोलिस स्टेशनला नेमणूकीस आहेत. त्यांनी दिलेल्या फिर्यादीनुसार ते शासकीय कामकाज करत असतांना विठ्ठल पाटील व सागर पाटील या दोघांनी त्यांच्या अंगावर धावून जात जातीवाचक शिवीगाळ केली. तसेच शर्ट फाडून दोघांनी हे.कॉ. जाधव यांना चापटा बुक्क्यांनी मारहाण केली. सागर पाटील याने हे.कॉ. जाधव यांना, तु भडगाव शहरात कुठेही भेटला तर तुला जीवंत सोडणार नाही अशी धमकी दिली.
त्यांच्या फिर्यादीनुसार दाखल गुन्ह्याचा पुढील तपास सहायक पोलिस अधिक्षक अभयसिंह देशमुख करत आहेत. या घटनेतील दोघांना अटक करण्यात आली आहे. यामुळे कायदा सुव्यवस्था सांभाळणाऱ्या पोलिसांनाच गुंडगिरीचा सामना करावा लागत असल्याचे दिसून आले आहे.
