जळगाव शहरात अनुराग स्टेट बँक कॉलनी येथील घटना
जळगाव (प्रतिनिधी) :- सिमेंटने भरलेले ट्रॅक्टर चढावावरून जात असतांना वाहनाची पिन तुटल्याने ट्रॅक्टर पलटी झाले. या ट्रॅक्टरखाली दबुन चालकाचा दुदैवी मृत्यू झाल्याची घटना शुक्रवारी दि. १२ सप्टेंबर रोजी सकाळी ११ वाजेच्या सुमारास अनुराग स्टेट बँक कॉलनी येथे घडली आहे. याबाबत रामानंद नगर पोलीस ठाण्यात अकस्मात मृत्यूची नोंद घेण्यात आली आहे.
गणेश मोरसिंग चव्हाण (वय ४७, रा. भैरव नगर, पिंप्राळा हुडको, जळगाव) असे मयत झालेल्या ट्रॅक्टर चालकाचे नाव आहे. गणेश चव्हाण हे ट्रॅक्टर चालवून कुटुंबाचा उदरनिर्वाह करत होते. शुक्रवारी सकाळी त्यांनी रेल्वे मालधक्क्यावरून ट्रॅक्टर (क्रमांक एमपी ६८ ए ०६४६) मध्ये सिमेंटच्या गोण्या भरल्या होत्या. (केसीएन)सकाळी ११ वाजेच्या सुमारास ते अनुराग स्टेट बँक कॉलनीतील एका चढणीवर ट्रॅक्टर घेऊन जात होते. याचवेळी अचानक त्यांचा ट्रॅक्टरमध्ये बिघाड होऊन पिन तुटली आणि सिमेंटने भरलेला ट्रॅक्टर पलटी झाला. या अपघातात गणेश चव्हाण ट्रॅक्टरखाली दाबले गेले आणि त्यांचा जागीच मृत्यू झाला.
या भीषण अपघाताची माहिती मिळताच रामानंद नगर पोलीस ठाण्याचे कर्मचारी, पोलीस कॉन्स्टेबल योगेश माळी, संदीप सोनवणे, चंद्रकांत पाटील आणि झुलालसिंग परदेशी यांनी तातडीने घटनास्थळी धाव घेतली. त्यांनी उपस्थित नागरीकांच्या मदतीने पलटी झालेला ट्रॅक्टर बाजूला केला आणि गणेश चव्हाण यांना बाहेर काढले.(केसीएन)गंभीर अवस्थेत त्यांना तातडीने शासकीय वैद्यकीय महाविद्यालयात दाखल करण्यात आले, मात्र तपासणीनंतर वैद्यकीय अधिकाऱ्यांनी त्यांना मृत घोषित केले. या घटनेची माहिती मिळताच चव्हाण यांच्या नातेवाईकांनी रुग्णालयात एकच आक्रोश केला. गणेश चव्हाण यांच्या आकस्मिक मृत्यूने पिंप्राळा हुडको परिसरातील त्यांच्या भैरव नगर भागावर शोककळा पसरली आहे. या संदर्भात रामानंद नगर पोलीस ठाण्यात अकस्मात मृत्यूची नोंद करण्यात आली असून, पोलीस पुढील तपास करत आहेत.
