जळगाव शहरातील घटना
जळगाव (प्रतिनिधी):- शहराच्या पिंप्राळा हुडको परिसरातील सिद्धार्थ नगरमध्ये एका ५६ वर्षीय प्रौढाने राहत्या घरात गळफास घेऊन आपली जीवनयात्रा संपवल्याची धक्कादायक घटना उघडकीस आली आहे. या घटनेमुळे परिसरात हळहळ व्यक्त केली जात असून, आत्महत्येचे नेमके कारण अद्याप समजू शकलेले नाही.
सिद्धार्थ नगर भागातील रहिवासी दिलीप रामा सपकाळे (वय ५६) हे आपल्या पत्नी आणि मुलासह वास्तव्यास होते. १२ मार्च रोजी संध्याकाळच्या सुमारास त्यांनी आपल्या राहत्या घरात गळफास घेतला. हा प्रकार त्यांच्या पत्नीच्या लक्षात येताच त्यांनी तातडीने मदतीसाठी धाव घेतली. दिलीप सपकाळे यांना तात्काळ खाली उतरवून उपचारासाठी शासकीय वैद्यकीय महाविद्यालय व रुग्णालयात दाखल करण्यात आले. मात्र, रुग्णालयात तपासणी केल्यानंतर डॉक्टरांनी त्यांना मृत घोषित केले.
या दुर्दैवी घटनेची माहिती मिळताच परिसरात शोककळा पसरली आहे. आत्महत्येमागील नेमके कारण अद्याप गुलदस्त्यात असून, या प्रकरणी रामानंद नगर पोलिस ठाण्यात अकस्मात मृत्यूची नोंद करण्यात आली आहे. या प्रकरणाचा पुढील तपास पोलिस हेड कॉन्स्टेबल कालसिंग बारेला हे करत आहेत.
