जामनेर (प्रतिनिधी) – घरातील व्यक्तीला लोखंडी रॉडने मारहाण करून महिलेच्या अंगावरील दागिने लांबवण्याची घटना जामनेर शहरातील वर्धमान नगरमध्ये घडली आहे. शनिवारी मध्यरात्रीच्या सुमारास दोन चोरट्यांनी चांगलाच हैदोस घातला. जामनेर पोलीस स्थानकात गुन्हा दाखल करण्यात आला आहे.
वर्धमान नगरमध्ये वसंत शंकर चव्हाण हे आपल्या परिवारासह राहतात. तोंडाला काळे रुमाल बांधलेल्या दोन चोरट्यांनी वसंत चव्हाण यांच्या घराच्या मागील दरवाजाचा कोयंडा तोडून जबरदस्तीने घरात प्रवेश केला. तर वरच्या मजल्यावरील खोलीचा व शेजाऱ्यांच्या घराच्या दरवाजाची बाहेरून कडी लावली होती. घरात प्रवेश केल्याबरोबर चोरट्यांनी वसंत चव्हाण यांना पाय व डोक्यावर रॉडने मारहाण करून जखमी केले. त्यांची पत्नी कलाबाई यांच्या गळ्यातील ६ ग्रॅम वजनाची पोत व कानातील दागिने हिसकावून पळ काढला.
वसंत चव्हाण यांना उपचारासाठी उपजिल्हा रुग्णालयात हलविण्यात आले होते. तर पोलिसांनी तपासासाठी श्वानपथकाची मदत देखील घेतली. कलाबाई चव्हाण यांच्या फिर्यादीवरून अज्ञात चोरट्यांविरुद्ध गुन्हा दाखल करण्यात आला आहे.
