माहेजी गावातील हरिदास वाडीजवळील गावठाण परिसरातून अज्ञात चोरट्याने ट्रक पळविला; पाचोरा पोलिसांत गुन्हा दाखल
पाचोरा (प्रतिनिधी) : पाचोरा तालुक्यातील माहेजी गावातील हरिदास वाडीजवळील गावठाण परिसरात उभी केलेली सुमारे दोन लाख रुपये किमतीची टाटा कंपनीची ट्रक अज्ञात चोरट्याने चोरून नेल्याची घटना उघडकीस आली आहे. याप्रकरणी पाचोरा पोलीस ठाण्यात १२ ऑक्टोबर २०२६ रोजी गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी फिरोज मुसा पठाण (वय ४१, व्यवसाय – ड्रायव्हर, रा. माहेजी, ता. पाचोरा, जि. जळगाव) यांच्या पाहुण्यांच्या मालकीची टाटा कंपनीची ट्रक चोरीला गेली आहे. ही ट्रक १२ टायरची असून तिचा नोंदणी क्रमांक MH 18 AA 7339 असा आहे. ट्रकवर पांढऱ्या, चॉकलेटी व निळ्या रंगाची सजावट असून, मागील बाजूस ‘कॅबेनवरा बाफना ब्रदर्स’ व ‘कॅरियर गुड’ असे लिहिलेले असल्याचे तक्रारीत नमूद आहे.
ही ट्रक २२ ऑगस्ट २०२६ रोजी रात्री ११ वाजेपासून २३ ऑगस्ट २०२६ रोजी सकाळी ५ वाजेच्या दरम्यान माहेजी गावातील हरिदास वाडीजवळील गावठाण परिसरात उभी होती. याच काळात अज्ञात चोरट्याने फिर्यादी यांच्या संमतीशिवाय व फसवणुकीच्या उद्देशाने ट्रक चोरून नेल्याचे तक्रारीत म्हटले आहे. चोरीस गेलेल्या ट्रकची किंमत अंदाजे दोन लाख रुपये आहे.
या प्रकरणी पाचोरा पोलीस ठाण्यात गुन्हा रजिस्टर क्रमांक ४८४/२०२६ अन्वये भारतीय न्याय संहितेच्या कलम ३०३(२) प्रमाणे गुन्हा दाखल करण्यात आला आहे.
पुढील तपास सुरू
या गुन्ह्याचा पुढील तपास पोलीस हेड कॉन्स्टेबल भगवान उमाळे (नेमणूक – पाचोरा पोलीस ठाणे) करीत आहेत. गुन्ह्यातील आरोपी अद्याप अज्ञात असून, चोरीस गेलेल्या ट्रकचा शोध घेण्याचे आव्हान पोलिसांसमोर आहे.
