पाचोरा शहरातील धक्कादायक घटना, शासनाने आर्थिक मदत देण्याची काँग्रेसची मागणी
पाचोरा (प्रतिनिधी) : शहरातील रेल्वे स्टेशन रोडवरील दहीहंडीत ३५ वर्षीय गोविंदा खाली पडल्याने गंभीर जखमी झाला होता. उपचारादरम्यान त्याचा मृत्यू झाला असून शहरात हळहळ व्यक्त होत आहे. मयत गोविंदाच्या परिवाराला आर्थिक मदत दिली पाहिजे अशी मागणी काँग्रेस पक्षाने केली आहे. याप्रकरणी पाचोरा शहर पोलीस स्टेशनला अकस्मात मृत्यूची नोंद करण्यात आली आहे.
नितीन पांडुरंग चौधरी (वय ३२, रा. पाचोरा) असे मयत तरुणाचे नाव आहे. त्याच्या पश्चात आई, वडील, २ भाऊ आहेत. रिक्षा चालवून तो परिवाराचा उदरनिर्वाह करीत होता. शहरातील स्टेशन रोड परीसरातील युवकांनी मंगळवारी दि. २७ रोजी दहीहंडीचे नियोजन केले होते. (केसीएन)यावेळी गोविंदा पथकातील नितीन पांडुरंग चौधरी हा दोन थरांची दहीहंडी फोडत असताना त्याचा तोल गेल्याने तो खाली डोक्याच्या भागावर पडला. त्याच्या मेंदूला जबर मार लागला. त्यास शासकीय रुग्णालयात दाखल करण्यात आले.
दरम्यान, उपचार सुरु असतांनाच आज दि. २८ रोजी मृत्यूशी झुंज देत अखेर नितीनची प्राणज्योत मालवली. त्यामुळे शहरात शोककळा पसरली. कॉग्रेस तालुका अध्यक्ष सचिन सोमवंशी यांनी पाचोरा ग्रामीण रुग्णालयात भेट दिली. यावेळी मयत नितीन चौधरी यांच्या परीवाराला शासनाने आर्थिक मदत करावी अशी मागणी मुख्यमंत्री एकनाथ शिंदे यांच्याकडे सोमवंशी यांनी केली आहे.(केसीएन) पाचोरा ग्रामीण रुग्णालयात वैद्यकीय अधिकारी डॉ. विजय पाटील यांनी शवविच्छेदन केले. नितीन हा घरातील कर्ता पुरुष होता. हसतमुख असणारा आणि नेहमी सामाजिक कार्यात सहभागी होणारा म्हणून त्याची ओळख होती. पाचोरा पोलीस स्टेशनला अकस्मात मृत्यूची नोंद करण्यात आली आहे.
