जळगावातील घटना, पोलीस दलापुढे आव्हान
जळगाव (प्रतिनिधी) :- येथील नवीन बसस्थानकात पत्नीला बसमध्ये बसवीत असताना प्रौढ व्यक्तीच्या पॅन्टच्या खिशातून २० हजार रुपयांची रोकड चोरून नेल्याची घटना मंगळवार दि. २४ जून रोजी सायंकाळी ५.३० वाजता घडली आहे. या संदर्भात बुधवारी २५ जून रोजी सायंकाळी जिल्हापेठ पोलीस ठाण्यात अज्ञात चोरट्यांवर गुन्हा दाखल करण्यात आला आहे. दरम्यान, बसस्थानकात चोरट्यांचा उच्छाद अनेक दिवसांपासून सुरुच आहे.
शहरातील नवीन बसस्थानक येथे गोपाल किसन बारी (वय-५१, रा.यावल जि.जळगाव) हे दि. २४ जून रोजी पत्नीसोबत जळगाव शहरात आलेले होते. दरम्यान सायंकाळी ५.३० वाजेच्या सुमारास ते बसमध्ये चढत असताना त्यांच्या पॅन्टच्या खिशातून २० हजार रुपयांची रोकड अज्ञात चोरट्यांनी चोरून नेली. ही घटना उघडकीला आल्यानंतर त्यांनी दुसऱ्या दिवशी बुधवारी २५ जून रोजी सायंकाळी ७ वाजता जिल्हापेठ पोलीस ठाण्यात धाव घेवून या संदर्भात फिर्याद दिली. त्यानुसार अज्ञात चोरट्यांवर गुन्हा दाखल करण्यात आला आहे. या घटनेचा पुढील तपास महिला पोलीस कॉन्स्टेबल अनिता वाघमारे ह्या करीत आहे.
