पोलीस, डॉक्टरांसह १८ साक्षीदारांची तपासणी ; जळगाव जिल्हा सत्र न्यायालयाचा निकाल
जळगाव (प्रतिनिधी) – कबड्डी सामन्यात वाद झाल्यावरुन दोन गटात हाणामारी झाली. त्यात एरंडोलमधील तरुणाचा खून झाल्याचा आरोप शिवसेना (उध्दव बाळासाहेब ठाकरे) पक्षाचे माजी नगराध्यक्ष तथा विद्यमान उपजिल्हाप्रमुख दशरथ बुधा महाजन यांच्यासह अन्य नऊ जणांवर होता. याप्रकरणाची आज शनिवारी जळगाव जिल्हा सत्र न्यायालयात सुनावणी झाली. न्यायमुर्ती शरद पवार यांच्या न्यायालयाने खून खटल्यातील आठही जणांची निर्दोष मुक्तता केली आहे. यापैकी एकाचा पुर्वीच मधुमेहाने मृत्यू झाला होता.
एरंडोल तालुक्यात ६ जून २०१८ रोजी कबड्डीच्या सामन्यातून ज्युनिअर महाविद्यालयात दोन गटांमध्ये वाद झाला होता. या वादातून उमेश उर्फ खंडू अशोक पाटील यांचा खून झाला होता. या प्रकरणात माजी नगराध्यक्ष तथा विद्यमान उपजिल्हाप्रमुख दशरथ बुधा महाजन, पवन नारायण महाजन, पंकज राजमल नेरकर, भरत गोकुळ महाजन, राहुल रवींद्र महाजन, धीरज विजय पाटील, चेतन मधुकर पाटील, रितेश रामा माळी आणि स्वप्नील प्रसाद महाजन यांच्याविरुध्द गुन्हा दाखल करण्यात आला होता. यापैकी चौघांची पुर्वीच जामिनावर मुक्तता करण्यात आली होती. तर १६ जून २०१८ पासून दशरथ महाजन, पवन महाजन, पंकज नेरकर, भरत महाजन, राहुल महाजन हे जिल्हा कारागृहात बंदी होते. दरम्यान, पवन याला मधुमेहाचा त्रास असल्यामुळे त्याच्यावर उपचार सुरू होते. उपचारादरम्यान त्याचा मृत्यू झाला होता. या खून खटल्यादरम्यान न्यायालयाने एकुण १८ साक्षीदारांची साक्ष नोंदवली. त्यात दोन पोलीस अधिकारी आणि तीन डॉक्टरांचा समावेश होता. घटनास्थळावरील सीसी टिव्ही फुटेज, वापरण्यात आलेली हत्यारे अन्य पुरावे आणि पोलिसांचा तपास यात बरीच तफावत असल्याचे बचाव पक्षाच्या वकिलांनी न्यायालयासमोर मांडले. तसेच पुर्वीच्या देखील जखमा मृत उमेश पाटील यांच्या अंगावर होत्या. त्यांचा खून चाकु आणि पाईपने करण्यात आला होता. घटनास्थळावरील पुराव्यांवरुन पोलीस देखील संभ्रमात होते. बचाव पक्षाच्या वतीने राहुल महाजन यांच्या बाजूने अ‍ॅड. सूरज जहांगिर, दशरथ महाजन यांच्यासह अन्य दोघांच्या बाजूने अ‍ॅड. अकील ईस्माईल तर पंकज नेरकर, पवन महाजन आणि भरत महाजन यांच्या बाजूने अ‍ॅड. ए. के. शिरोळे यांनी काम पाहिले. तर अ‍ॅड. व्ही. एच. पाटील आणि अ‍ॅड. सागर चित्रे यांनी मदत केली.
