नागपूर – राज्य सरकारच्या बदल्यांच्या निर्णयावर विरोधी पक्ष नेते देवेंद्र फडणवीस यांनी एक वर्ष बदल्या नाही केल्या तर काय फरक पडतो? असा प्रश्न उपस्थित करत जोरदार निशाणा साधला आहे. ‘राज्यातील कोरोना संकट वाढले आहे. मृत्यूदरही वाढत आहे. या संकटाचा सामना करण्याऐवजी ठाकरे सरकारने राज्यात अधिकाऱ्यांच्या बदल्यांचा धंदा सुरू केला आहे,’ असा गंभीर आरोप त्यांनी केला.
पूर्व विदर्भातील पुरस्थितीचा आढावा घेण्यासाठी विरोधी पक्षनेते देवेंद्र फडणवीस आज विदर्भाच्या दौऱ्यावर आले होते. यावेळी देवेंद्र फडणवीस यांनी माध्यमांशी संवाद साधताना त्यांनी ठाकरे सरकारवर जोरदार टीका केली.
कोरोनाच्या काळात बदल्या करणे इतके महत्त्वाचे आहे का?
‘राज्यात कोरोनाचे संकट वाढले आहे. कोरोनामुळे मृत्यूदरही वाढत आहे. अशावेळी राज्यातील कोरोना चाचण्यांची संख्या वाढवण्याची गरज आहे. मात्र, याऐवजी राज्यातील मंत्री आणि अधिकारी कुणाला कुठे आणि कशी पोस्टिंग मिळेल, यामध्ये गुंग झाले आहेत. कोरोनाच्या काळात बदल्या करणे इतके महत्त्वाचे आहे का?, एक वर्ष बदल्या झाल्या नसत्या तर काय फरक पडला असता?, असा सवाल करत राज्यात सध्या बदल्यांचा धंदा सुरू झाला आहे,’ अशी टीका देवेंद्र फडणवीस यांनी केली.
कोरोनाच्या काळात १५ टक्के बदल्या करण्याचा निर्णय घेणे चुकीचे
राज्यात १८ ते २० लाख कर्मचारी आहेत. मात्र, ही संख्या ७ ते ८ लाख एवढी जरी पकडली आणि त्यातील १५ टक्के कर्मचाऱ्यांच्या बदल्यांचा आकडा जरी काढला तरी ही संख्या खूप मोठी होते. कोरोनाच्या काळात १५ टक्के बदल्या करण्याचा निर्णय घेणे हे चुकीचे आहे, असे देवेंद्र फडणवीस यांनी सांगितले.
बदल्यांचा खर्च वाढविण्याची गरज काय?
याचबरोबर, बदली केल्यावर संबंधित अधिकारी-कर्मचाऱ्याला भत्ता द्यावा लागतो. त्यासाठी सुमारे ५०० कोटींचा खर्च येतो. कोरोनामुळे राज्यात आर्थिक संकट असताना बदल्यांचा खर्च वाढविण्याची काय गरज होती?, असेही देवेंद्र फडणवीस यांनी सांगितले.
ठाकरे सरकारकडून ४० पोलीस अधिकाऱ्यांच्या बदल्यांचा आदेश
तत्पूर्वी, महाविकास आघाडी सरकारकडून राज्याच्या पोलीस विभागात मोठे बदल करण्यासंबंधीची चर्चा सुरु होती. मात्र पोलीस महासंचालक सुबोध जयस्वाल यांनी, गणेशोत्सव पार पडेपर्यंत पोलीस अधिकाऱ्यांच्या बदल्या करू नयेत अशी भूमिका घेतल्याने बदल्या लांबणीवर पडल्या होत्या. मात्र आता गणेशोत्सव संपल्यानंतर ठाकरे सरकारकडून ४० पोलीस अधिकाऱ्यांच्या बदल्यांचा आदेश काढण्यात आला आहे.
