जळगाव शहरातील शाहूनगर येथील घटना
जळगाव (प्रतिनिधी) : शहरातील शाहूनगर येथे क्रिकेट खेळत असताना मुलांमध्ये वाद झाल्याने तो वाढत जाऊन दोन गटात जोरदार हाणामारी झाली. यात सहा जण जखमी झाले आहे. ही घटना रविवार, १६ जून रोजी घडली. जखमींमध्ये १२ वर्षीय मुलीसह ६५ वर्षीय वृद्धेचा समावेश आहे.
शाहू नगर परिसरात रविवारी दुपारी काही मुले क्रिकेट खेळत होते. त्यातून त्यांच्यात वाद झाले. हा वाद वाढत जाऊन दोन गट एकमेकांना भिडले. यात हाणामारी झाल्याने शाहीनबी याकूब खान (३९), अलबिना तसलीम भिस्ती (१२), इरफान कालू खान (३५), समीनाबी शेख मुस्लीम (३४), साबेराबी सिराज भिस्ती (६५), सलमान सिराज भिस्ती (३०) सर्व रा. शाहू नगर हे सहा जण जखमी झाले.
घटनेची माहिती मिळताच शहर पोलिस ठाण्याचे अधिकारी, कर्मचारी घटनास्थळी पोहचले. त्यांनी परिस्थिती नियंत्रणात आणली. जखमींना शासकीय वैद्यकीय महाविद्यालय व रुग्णालयात नेण्यात आले. तेथे त्यांच्यावर उपचार करण्यात आले. दरम्यान किरकोळ कारणावरून हाणामारीच्या घटनांमध्ये सातत्याने वाढ होत असल्याने समाजमनातून चिंता व्यक्त केली जात आहे.
