दिल्ली पोलिसांच्या विशेष पथकाची कारवाई
भुसावळ (प्रतिनिधी) शहरातील मिल्लत नगर भागात राहणाऱ्या एकाला दिल्ली पोलिसांच्या विशेष पथकाने एकाला अटक केली आहे. त्याच्याविरुद्ध २००१ मध्ये युएपीए कायद्याअंतर्गत दिल्ली पोलिसात गुन्हा दाखल आहे. हा व्यक्ती “सिमी” संघटनेशी संबंधित असल्याची माहिती मिळत आहे.
हानिफ शेख मोहम्मद असे अटक केलेल्या संशयित आरोपीचे नाव आहे. दिल्ली पोलिसांच्या विशेष पथकाने गुरुवारी दि. २२ फेब्रुवारी रोजी दुपारी भुसावळमध्ये धडक दिली. पोलिसांनी गोपनीय माहिती तसेच तांत्रिक विश्लेषणावरून हानिफ शेख मोहम्मद याचा पत्ता शोधून काढला होता. त्यांनतर स्थानिक पोलिसांच्या मदतीने सापळा रचून मिल्लत नगरमधील राहत्या घरातून त्याला अटक करण्यात आली. दिल्ली पोलिसांच्या विशेष पथकातील पोलीस निरीक्षक पवनकुमार यांनी माध्यम प्रतिनिधींना सांगितले की, दिल्लीतील न्यू फ्रंट कॉलनी पोलीस स्थानक २८ सप्टेंबर २००१ युएपीए कायदा तसेच १५३ अ, १५३ ब आणि १२० ब कलमान्वये गुन्हा दाखल आहेत.
गुन्हा दाखल असल्यापासून हानिफ शेख हा फरार होता. दरम्यान, २००१ मधील गुन्हा प्रतिबंधित दहशतवादी संघटना ‘सिमी’ शी संबंधित असल्याचेही त्यांनी सांगीतले. अटक केल्यानंतर दिल्ली पोलिसांच्या विशेष पथकाने संशयित आरोपीची वैद्यकीय तपासणी केली आणि भुसावळ न्यायालयात हजर केले. न्यायालयाकडून ४८ तासांचा ट्रांझिस्ट रिमांड घेतल्यानंतर दिल्ली पोलिसांचे विशेष पथक तात्काळ दिल्लीच्या दिशेने रवाना झाले. दरम्यान, संशयित हानिफ शेख हा खडका रोडवरील पालिकेच्या उर्दू शाळेत शिक्षक असल्याचे कळते. तसेच २००१ मध्ये प्रतिबंधित दहशतवादी संघटना ‘सिमी’चे निघणारे ‘इस्लामिक मुव्हमेंट’ नामक मासिकमध्ये प्रक्षोभक लिखाण केल्याच्या गुन्ह्यात हानिफवर आरोप असल्याचेही कळते.