नवी दिल्ली (वृत्तसंस्था) – चीनच्या वुहान शहरातून कोरोनाचा जगभरात प्रसार झाला. जगभरातील जवळपास सर्वच देश या जीवघेण्या कोरोनाच्या विळख्यात अडकले आहेत. परंतु, सध्या इतर देशांच्या तुलनेत अमेरिकेत या विषाणूचा प्रादुर्भाव सर्वाधिक दिसून येत आहे. अमेरिकेचे राष्ट्रपती डोनाल्ड ट्रम्प यांच्यानंतर आता विदेश मंत्री माइक पॉम्पियो यांनीही वुहानच्या प्रयोगशाळेतूनच कोरोनाचा प्रसार झाल्याचा दावा केला आहे.
अमेरिकेचे विदेश मंत्री माइक पॉम्पियो यांनी याविषयी माहिती दिली. कोरोना विषाणू चीनच्या कपटीपणाचं फळ असल्याचे सांगत पॉम्पियो यांनी आमच्याकडे हा विषाणू वुहानमधूनच आला असल्याचे सबळ पुरावेदेखील असल्याचे म्हटले. अमेरिकेतील एका वृत्तवाहिनीतील कार्यक्रमात माइक पॉम्पियो यांनीदेखील चीनवर आरोप केला आहे. चीनकडे कोरोना थांबवण्याची संधी होती, परंतु त्यांनी मुद्दाम असे केले नसल्याचेही त्यांनी यावेळी म्हटले.
माइक पॉम्पियो यांनी, लक्षात ठेवा जगभरात व्हायरस परवण्यासाठी आणि निन्म स्तरांतील प्रयोगशाळा सुरु करण्यासाठी चीनचा फार जुना रेकॉर्ड आहे. चीनमुळे जगभरात व्हायरस पसरण्याची ही पहिली वेळ नाही. गुप्तचर विभाग यासंदर्भात माहिती गोळा करत आहे. याआधीही अमेरिकेचे राष्ट्रपती डोनाल्ड ट्रम्प यांनी चीनविरोधात पुरावे असल्याचे सांगितले आहे.
आश्चर्याची गोष्ट म्हणजे, अमेरिकेचे राष्ट्रपती डोनाल्ड ट्रम्प आणि अमेरिकेचे विदेश मंत्री माइक पॉम्पियो जरी कोरोना जगभरात पसरवण्यासाठी चीन जबाबदार असल्याचे सांगत असले, तरीही अमेरिकेतील गुप्तचर विभागाने कोरोना मानव निर्मित असल्याचा दावा फेटाळून लावला आहे. दरम्यान, अमेरिकेमध्ये कोरोनाचे 11 लाख 85 हजार 285 रूग्ण आहेत. तर 68,507 लोकांचा मृत्यू झाला आहे.
