पारोळा येथील धक्कादायक घटना, संशयिताचाही आत्महत्याचा प्रयत्न
पारोळा (प्रतिनिधी) तालुक्यातील शहरात 20 वर्षीय विद्यार्थिनीचे अपहरण करून तिला कासोदा येथे नेत तिघांनी सामूहिक बलात्कार केला. त्यानंतर तिला जबरदस्ती विष पाजून ठार मारण्याचा प्रयत्न केला. जबर जखमी असलेल्या तरुणीला बसस्थानकाच्या मागे फेकून नराधमांनी डाव साधला. उपचारादरम्यान मंगळवारी दहा नोव्हेंबर रोजी तिची प्राणज्योत मालवली आहे. या धक्कादायक घटनेमुळे जळगाव जिल्ह्यासह राज्यात संताप व्यक्त केला जात आहे.
पारोळा येथील साने गुरुजी कॉलनी रहिवासी असलेल्या विद्यार्थिनीच्या 32 वर्षीय मामाने पारोळा पोलीस स्टेशनला मंगळवारी फिर्याद दिली आहे. फिर्यादीत म्हटले आहे की, त्यांची दोन क्रमांकाची बहीण टोळी ता. पारोळा येथे राहते. बहिणीला तीन मुली व दोन मुले आहेत. त्यातील क्र.2 ची मुलगी ही पारोळा शहरातील आर. एल. महाविद्यालयात विज्ञान शाखेत द्वितीय वर्षात पदवीचे शिक्षण घेत आहे. ३ नोव्हेंबर रोजी भाची फिर्यादीकडे राहण्यास आली होती. ७ नोव्हेंबर रोजी सकाळी ११ वाजता फिर्यादी मामा हे बाजारात गेले होते. दुपारी तीन वाजता घरी आले, त्यावेळी भाची घरात दिसली नाही. त्यांनी शोधाशोध केली मात्र मिळून न आल्यामुळे दुसऱ्या दिवशी ८ नोव्हेंबरला भाची बेपत्ता झाल्याची पारोळा पोलीस स्टेशनला नोंदवली. त्यानंतर ८ तारखेलाच संध्याकाळी ५.३० वाजेच्या सुमारास त्यांना माहिती मिळाली की, पारोळा कुटीर रुग्णालयात एका तरुणीस विषबाधा झाल्यामुळे दाखल केले आहे. त्यामुळे त्यांनी खात्री करण्यासाठी कुटीर रुग्णालयात धाव घेतली. तेथे उपचार घेत असलेली तरुणी त्यांची भाची असल्याचे त्यांनी ओळखले. त्यानंतर त्यांनी त्यांची बहीण व भाचीची आई यांना माहिती देत पारोळ्याला बोलविले. पुढील उपचारासाठी त्यांनी धुळे येथील जिल्हा सामान्य रुग्णालयात रुग्णवाहिकाने हलविण्याचा निर्णय घेतला.
रुग्णवाहिकेत नेत असताना फागणे गावाजवळ रुग्णवाहिका आली असताना भाचीला शुद्ध आली. त्यावेळी तिने फिर्यादी मामा, तिची आई व मोठी बहिण यांना घटना कथन केली. तिने सांगितले की, टोळी येथील शिवानंद शालिक पवार हा मैत्री करण्यासाठी फोन करण्याचा सारखा इशारा करीत असे. पण मी लक्ष देत नव्हती. त्यामुळे शिवनंदन शालीक पवार, पप्पू अशोक पाटील, अशोक वालजी पाटील यांनी माझ्यावर अतिप्रसंग करून सामूहिक बलात्कार केला आहे. तसेच पारोळा येथून अपहरण करून गुंगीचे औषध देत कासोदा गावाच्या जवळ अज्ञात ठिकाणी नेऊन सामूहिक बलात्कार केला आहे. त्यास विरोध केला असता तिघांनी व एक अज्ञात महिलेने लाथा बुक्क्यांनी मारहाण करून शिवीगाळ करीत, आम्ही सांगू तसे वाग, नाहीतर तुला मारून टाकू अशी दमदाटी केली होती. यामुळे माझ्या शरीरावर गंभीर दुखापती झाल्या असल्याचे तिने मामा व आईला सांगितल्याचे फिर्यादीत म्हटले आहे. त्यामुळे तिच्यावर धुळे येथील जिल्हा सामान्य रुग्णालयात उपचार सुरू होते.
मंगळवारी पहाटे उपचार घेत असताना तिची प्राणज्योत मावळली. या घटनेमुळे पारोळा शहरात प्रचंड तणाव निर्माण झाला असून मोठा पोलिस बंदोबस्त ठेवण्यात आला आहे. या ठिकाणी चर्मकार संघाचे पदाधिकारी भानुदास वसावे, सामाजिक कार्यकर्ते पिरन अनुष्ठान यांनी पारोळा पोलीस स्टेशन या ठिकाणी भेट देत घटनेची माहिती जाणून घेतली. दोषी संशयित आरोपींना अटक करून कठोर कारवाई करण्याची मागणी केली आहे. या प्रकरणी पोलीस पुढील तपास करीत असून काही जणांना ताब्यात घेतल्याची माहिती मिळत आहे. या घटनेमुळे जिल्ह्यासह राज्यभर संताप व्यक्त केला जात आहे.
दरम्यान पारोळा पोलीस स्टेशनचे पोलीस निरीक्षक लीलाधर कानडे यांच्याशी “केसरीराज”ने संपर्क साधला असता त्यांनी सांगितले की, या प्रकरणी शिवनंदन शालीक पवार व अशोक वालजी पाटील या संशयितांना ताब्यात घेतले असून पोलिस पुढील तपास करीत आहे. तसेच शिवनंदन पवार याने सोमवारी विष प्राशन करून आत्महत्या करण्याचा प्रयत्न केला होता. त्याच्यावर धुळे जिल्हा सामान्य रुग्णालयात उपचार सुरू आहे. तेथे सुद्धा पोलिस बंदोबस्त ठेवलेला आहे. या प्रकरणी लवकरच दोषींना अटक करून त्यांना शिक्षा होण्यासाठी प्रयत्न केले जातील, असेही कानडे यांनी सांगितले.
