जळगाव [प्रतिनिधी] – जळगाव येथील रामेश्वर कॉलनी परिसरातील रहिवासी अहमदाबाद येथे कामाच्या निमित्ताने गेल्याचा फायदा घेत चोरट्यांनी मध्यरात्री घरफोडी करून घरातील कपाटातून ५० हजार रूपयांची रोख रक्कम चोरून नेल्याची घटना उघडकीस आली. याप्रकरणी एमआयडीसी पोलीस ठाण्यात चोरट्यांविरोधात गुन्हा दाखल करण्यात आला आहे.
सारीका प्रल्हाद खरे (वय-३७) रा. तुळशीराम नगर, रामेश्वर कॉलनी या भाड्याने राहतात. सारीका खरे यांच्या सासरी अहमदाबाद येथे श्राध्दचा कार्यक्रम असल्याने त्या गावाला गेल्या. तर मुलगा स्वप्निल हा खामगाव जि.बुलढाणा येथे मित्राकडे गेला होता. त्यांनी घराला कुलूप लावून दि.५ सप्टेंबर रोजी सायंकाळी ७ वाजता घरासमोर राहणाऱ्या आशाबाई पाटील यांच्याकडे घराची चाबी दिली होती. दि. ८ सप्टेंबर रोजी घरात चोरी झाल्याचे शेजारी राहणारे अतुल पाटील यांनी सारिका खरे यांना फोनद्वारे माहिती दिली.दि.9 रोजी सकाळी ४ वाजता सारिका खरे या गावाहून घरी आल्यावर त्यांनी पाहिले असताना घराचे दोन्ही दरवाजे उघडे आणि कपाटातील ५० हजार रूपये रोख, एलसीडी टिव्ही आणि काही वस्तू असा एकुण ५५ हजार ३०० रूपयांचा मुद्देमाल चोरीस गेला आहे. सारीका खरे यांच्या फिर्यादीवरून एमआयडीसी पोलीस ठाण्यात अज्ञात चोरट्यांविरोधात गुन्हा नोंदविण्यात आला आहे. पुढील तपास पोहेकॉ महेंद्रसिंग पाटील, महेंद्र गायकवाड हे करीत आहे.
