नवविवाहितेचा सासूसमोरच दुदैवी मृत्यू; नातेवाईकांचा आक्रोश
जळगाव (प्रतिनिधी) : डिसेंबर महिन्यात २ महिन्यांपूर्वी लग्न झाल्यानंतर पहिल्यांदाच अकोला येथून मुंबई येथे संसाराचा सामान घेऊन अमरावती-मुंबई रेल्वेतून प्रवास करत असताना अचानक नवविवाहितेची तब्येत बिघडली आणि त्यांचा उपचारापूर्वीच मृत्यू झाला. या घटनेमुळे तिच्या परिवारावर दुःखाचा डोंगर कोसळला आहे. या संदर्भात भुसावळ रेल्वे पोलीस ठाण्यात अकस्मात मृत्यूची नोंद करण्यात आली आहे.
प्रियंका अक्षय सुरोशे (वय-२०, रा. ज्ञानेश्वर नगर, अकोला) असे मयत विवाहितेचे नाव आहे. प्रियंका यांच्या पश्चात पती अक्षय सुरोसे, सासू, आई-वडील, भाऊ, दोन बहिणी असा परिवार आहे. अक्षय सुरोशे हे मुंबईतील एका खाजगी कंपनीत कार्यरत असल्याने प्रियंका २ महिने सासरी राहिल्यानंतर मुंबईत स्थायिक होण्यासाठी अकोला येथून निघाल्या होत्या. दिनांक २९ जानेवारी रोजी रात्री ८ वाजता अमरावती-मुंबई एक्सप्रेसमध्ये सासू साधना सुरोशे यांच्यासोबत त्यांनी प्रवास सुरू केला. त्यांच्यासोबत संसाराचा सामानही होता. शेगाव स्थानकाजवळ प्रियंकाने रेल्वेत जेवण केले.
मात्र, काही वेळाने मलकापूरजवळ अचानक त्यांची तब्येत बिघडली आणि त्यांना उलट्या सुरू झाल्या. प्रकृती अधिक खालावल्याने सासू साधना सुरोसे यांनी रेल्वेतील टीसीशी संपर्क साधून तातडीने वैद्यकीय मदतीची मागणी केली. टीसीने “भुसावळ येथे उपचार मिळतील” असे सांगितले. मात्र, प्रियंका यांची प्रकृती गंभीर होत गेली. रेल्वे भुसावळ स्थानकात पोहोचताच त्यांना तातडीने उपचारासाठी हलवण्यात आले. मात्र, रात्री १२ वाजता त्यांचा दुर्दैवी मृत्यू झाला.
प्रियंका यांचा मृतदेह जळगावच्या शासकीय वैद्यकीय महाविद्यालयात हलवण्यात आला. मृत्यूची बातमी कळताच प्रियंकाचे माहेर असलेल्या बिलवाडी ता. जळगाव येथील माहेरच्या मंडळींनी रुग्णालयात धाव घेतली आणि एकच हंबरडा फोडला. या घटनेची भुसावळ रेल्वे पोलीस ठाण्यात अकस्मात मृत्यू म्हणून नोंद करण्यात आली आहे. पुढील तपास रेल्वे पोलीस कर्मचारी नंदू खरडे करीत आहेत.
