अमळनेर तालुक्यातील संशयितांचे गुन्हेगारी कृत्य
अमळनेर (प्रतिनिधी) :- प्रेम प्रकरणात पळून गेलेल्या दोघांची माहिती मिळवण्यासाठी पाच जणांनी बेपत्ता मुलाच्या भावाचे अपहरण करून त्याला मारहाण केल्याची घटना १४ रोजी घडली आहे. याप्रकरणी अमळनेर पोलीस स्टेशनला पाच जणांविरुद्ध अपहरण आणि मारहाणीचा गुन्हा दाखल करण्यात आला आहे.
किरण नामदेव कुंभार (वय ३० रा. सानेनगर) याचा भाऊ दीपक हा १५ दिवसांपूर्वी जळगाव येथे पेपर देण्यासाठी जातो असे सांगून घरातून निघून गेला होता. तो घरी परत आला नाही. नंतर त्याला कळले की तो सुरत येथे जाऊन अरुण व्यंकट पाटील यांची नातीला घेऊन पळून गेला आहे. दि. १४ रोजी रात्री साडे नऊ वाजता अरुण व्यंकट पाटील त्याच्याजवळ आले व म्हणाले की पांढऱ्या रंगांच्या कारमध्ये पोलीस बसले आहेत, तू गाडीजवळ चल. कारमध्ये चार जण बसले होते. एकाने त्याचा हात पकडून गाडीत बसवले. तर दुसऱ्याने मोबाईल बंद केला. ते बळजबरीने नेत असल्याने किरण आरडाओरड करू लागला. चौघांनी त्याचे तोंड रुमालाने बांधले आणि गाडी धुळ्याच्या दिशेने नेली. रस्त्यात निर्जन स्थळी गाडी नेऊन त्याचा भाऊ दिपक व मुलीबद्दल विचारपुस करताना चापट बुक्क्यानी मारहाण केली आणि शिवीगाळही केली.
पुनः गाडीत बसवून धुळे मार्गे नाशिककडे गाडी नेली. रस्त्यात पुन्हा एका हॉटेलमध्ये दारू पिले आणि किरणला मारहाण करीत राहिले. नंतर मालेगाव रोडच्या एका हॉटेलवर नेऊन त्याच्या शेजारील टपरीमध्ये कोंडून ठेवले. एका संशयिताने पुन्हा टपरीच्या बाहेर काढून पुन्हा चापटांनी बुक्क्यांनी मारहाण केली. दि. १५ रोजी सकाळी साडे दहा वाजता पाचही जणांनी त्याला तेथेच सोडून दिले. एकाने भाड्याला १०० रुपये आणि चप्पल दिले. रिक्षाने किरण अमळनेरला घरी आला. आईवडीलांना घटना सांगून दवाखान्यात उपचार केले. किरणच्या फिर्यादीवरून अमळनेर पोलीस स्टेशनला अरुण व्यंकट पाटील व इतर चार जणांविरुद्ध भारतीय न्याय संहिता गुन्हा दाखल केला असून तपास हेडकॉन्स्टेबल अशोक साळुंखे करीत आहेत.
