जीओ टॉवरजवळील जनरेटरमधून २३० लिटर डिझेल लंपास; अज्ञात चोरट्याविरुद्ध गुन्हा दाखल
नशिराबाद (प्रतिनिधी) :- नशिराबाद परिसरातील पाटील नर्सरीसमोरील शेतात, खिर्डी शिवाराजवळ असलेल्या जीओ टॉवरच्या जनरेटरमधून तब्बल २३० लिटर डिझेल चोरीला गेल्याची घटना समोर आली आहे. चोरी झालेल्या डिझेलची किंमत सुमारे २० हजार ७०० रुपये आहे. याप्रकरणी नशिराबाद पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी विजय नगराज पाटील (वय ४९, व्यवसाय सुपरवायझर, जिओ कंपनी, रा. अथर्व कॉलनी, आशाबाबा नगरजवळ, जळगाव) यांच्या देखरेखीखाली जीओ कंपनीचा टॉवर परिसरात आहे. या टॉवरच्या जनरेटरमध्ये डिझेल ठेवण्यात आले होते.
२८ ऑगस्ट २०२६ रोजी रात्री ९ ते १० वाजेच्या दरम्यान अज्ञात चोरट्याने फिर्यादी यांच्या निगराणीखाली असलेल्या टॉवरच्या जनरेटरमधील २३० लिटर डिझेल, अंदाजे २० हजार ७०० रुपये किमतीचे, फिर्यादी यांच्या संमतीशिवाय लबाडीच्या इराद्याने चोरून नेले.
डिझेल चोरीस गेल्याचे निदर्शनास आल्यानंतर विजय पाटील यांनी नशिराबाद पोलिस ठाण्यात फिर्याद दिली. त्यावरून गुन्हा रजिस्टर क्रमांक २५८/२०२६, भारतीय न्याय संहिता कलम ३०३(२) अन्वये गुन्हा दाखल करण्यात आला आहे.
या प्रकरणाचा पुढील तपास पोहेकॉ/२०९६ प्रशांत विरणारे करीत आहेत. पोलिसांनी आरोपीचा शोध सुरू केला असून, या प्रकरणात आरोपी अटक करण्यात आली आहे, अशी नोंद पोलिस कागदपत्रात करण्यात आली आहे.
