एरंडोल शहरातील दुपारची घटना
एरंडोल ( प्रतिनिधी ) : – तालुक्यातील खडकेसिम येथील बचत गटाच्या अध्यक्षा व सचिव यांनी एरंडोल येथील स्टेट बँकेतून कर्जाची ४ लाख ६० हजार रुपये काढले. त्यानंतर घरी परत जात असताना दुचाकीवरुन आलेल्या दोघांनी ही पैशांची पिशवी धूम स्टाईलने लंपास केल्याची घटना बुधवारी सायंकाळी घडली. याप्रकरणी एरंडोल पोलीस स्टेशनला गुन्हा दाखल करण्यात आला आहे.
तालुक्यातील खडकेसिम येथील महिला बचत गटाच्या अध्यक्षा जयश्री योगेश सुतार व सचिव संगीता भरत पाटील या बचत गटाची कर्जाची रक्कम एरंडोलच्या स्टेट बँक शाखेतून काढून घरी जात होत्या. दरम्यान, महाजन कलेक्शनजवळ समोरून आलेल्या दुचाकीवरील २ अनोळखी चोरट्यांपैकी मागे बसलेल्या भामट्याने रोकड असलेली पिशवी १६ जुलैला सायंकाळी ४.१५ वाजता धूम स्टाईलने लांबवली. दरम्यान, जयश्री सुतार यांच्या पायातील चप्पलेत साडी अडकल्याने ती काढण्यासाठी त्यांनी हातातील पिशवी बाजूच्या ओट्यावर ठेवली. त्याचवेळी चोरट्यांनी संधी साधून पैशांची पिशवी घेऊन पोबारा केला. तर खडकेसिम येथे सावित्री महिला बचतगट असून त्यात एकूण १० सदस्य आहेत. या बचत गटाच्या अध्यक्षा जयश्री सुतार तर सचिव संगीता पाटील आहेत.
महाराष्ट्र शासनाच्या उमेद अभियानांतर्गत मे महिन्यात ६ लाखांचे कर्ज या बचत गटास मंजूर झाले आहे. त्यांनी यापूर्वी १ लाखाची रक्कम काढलेली आहे. मात्र, या कर्जाचे सुमारे ४० हजारांचे २ हप्ते कपात होऊन या बचत गटाच्या बँक खात्यावर ४ लाख ६० हजारांची रक्कम शिल्लक होती. दरम्यान, १६ जुलैला दुपारी सुतार व पाटील या दोन्ही बचत गटाच्या पदाधिकाऱ्यांनी एरंडोलच्या स्टेट बँकेत जाऊन ही रक्कम धनादेशाद्वारे काढली. ती रक्कम कापडी पिशवीत ठेऊन घराकडे पायी जात असताना ही घटना घडली. या घटनेचा तपास एरंडोल पोलिस करत आहेत.
