नागपूर (वृत्तसंस्था) – राज्यात करोनाबाधितांची संख्या चिंताजनक असल्याने लॉकडाउनच्या पार्श्‍वभूमीवर सर्वच शाळा आणि महाविद्यालये बंद आहेत. मात्र, चंद्रपूर आणि गडचिरोली जिल्ह्यात जिल्हा परिषद शाळा सुरु करण्याचा मोठा निर्णय घेण्यात आला आहे. याबाबत पालकमंत्री आणि मदत व पुनर्वसन मंत्री विजय वडेट्टीवार यांनी महत्त्वपूर्ण घोषणा केली आहे. या दोन्ही जिल्ह्यांमधील जिल्हा परिषद शाळा 4 ऑगस्टपासून सुरु करण्यात येणार आहेत.
चंद्रपूर आणि गडचिरोली दोन्ही जिल्ह्यात करोनाचा प्रादुर्भाव कमी आहे. सोबतच या जिल्ह्यात ऑनलाईन शिक्षणाची आवश्‍यक साधनं नसल्याने ऑनलाईन शिक्षण शक्‍य नसल्याचे प्रशासनाने म्हटले आहे. याचाच विचार करुन या दोन्ही जिल्ह्यांमधील जिल्हा परिषद शाळा सुरु करण्याचा निर्णय घेण्यात आला आहे.
या संदर्भात स्वतः विजय वडेट्टीवार यांनी शिक्षणमंत्री वर्षा गायकवाड यांच्यासोबत चर्चा करुन निर्णय घेतला आहे. कोविड संदर्भातील सर्व नियमांचं पालन करुन शाळा सुरु होतील, असेही वडेट्टीवार यांनी नमूद केले. तसेच शाळांसाठी स्वतंत्र नियमावली बनवली जाईल, असेही त्यांनी स्पष्ट केले.
दरम्यान, चंद्रपूर जिल्ह्यातील एकूण बाधितांची संख्या 260 वर पोहचली आहे. शनिवारी (18 जुलै) दिवसभरात नव्याने 17 करोना रुग्णांची नोंद झाली. सध्या 112 सक्रिय करोना रुग्ण उपचार घेत आहेत. आतापर्यंत उपचारानंतर 148 जण करोनामुक्त झाले आहेत.
