जळगावातील बेंडाळे चौकात मध्यान्हाची घटना
जळगाव (प्रतिनिधी) :- शहरातील बेंडाळे चौकात असलेल्या चंद्रिका सॉ मिल व प्लायवूडच्या दुकानाला आज दि.२६ रोजी दुपारी बाराच्या सुमारास भीषण आग लागली. या दुर्घटनेत सॉ मिलसह जवळच्या काही टपऱ्या मिळून ५० ते ६० लाखांचे नुकसान झालेले आहे. अग्निशमन दलाकडून आग विझविण्याचे प्रयत्न मुसळधार पावसातही सुरू होते.
जळगाव शहरातील बेंडाळे चौकात असलेल्या चंद्रिका सॉ मिलला आज दुपारी १२ वाजेच्या सुमारास अचानक आग लागली. यावेळी जोरदार मुसळधार पाऊस सुरू असतानाही आगीने रौद्ररूप घेतले. जळगाव अग्निशमन दलाचे बंबांना पाचारण करण्यात आले. मात्र, आग आटोक्यात येत नसल्याने जिल्ह्यातील इतर ठिकाणाहूनही बंबांना पाचारण करण्यात आले होते.(केसीएन)३ तासांपासून आग नियंत्रणात आणण्यासाठी अग्निशमन दल व नागरिक यांनी प्रयत्न केले. एकूण ६ आगीचे बंब लागल्याचे दिसून आले. गर्दी कमी करण्यासाठी शनिपेठ पोलीस स्टेशनच्या कर्मचाऱ्यांनी प्रयत्न केले. शॉर्ट सर्किटमुळे आग लागल्याचा अंदाज व्यक्त केला जात आहे. या घटनेत चंद्रिका सॉ मिलला लागून असणाऱ्या काही टपऱ्या यांनाही झळ बसल्याने आगीत जळल्या आहेत.
