धरणगाव तालुक्यातील मुसळी येथील घटना
धरणगाव (प्रतिनिधी): मुलांच्या क्रिकेट खेळण्याच्या जुन्या वादातून दोन गटात तुंबळ हाणामारी झाल्याची घटना धरणगाव तालुक्यातील मुसळी येथे घडली आहे. या वादात आरोपीने सुऱ्याने (चाकू) हल्ला केल्यामुळे एकाच कुटुंबातील पती, पत्नी आणि वडील असे तिघे जण जखमी झाले आहेत. याप्रकरण धरणगाव पोलीस ठाण्यात तिघांविरुद्ध गुन्हा दाखल करण्यात आला आहे.
मुसळी येथील रहिवासी गजानन देविदास ढमाले (वय ४३) यांच्या मुलाचा आणि आरोपींच्या मुलांचा काही दिवसांपूर्वी क्रिकेट खेळण्यावरून वाद झाला होता. याच वादाचा राग मनात धरून ४ जानेवारी रोजी संध्याकाळी ७:३० वाजेच्या सुमारास गजानन ढमाले यांच्या घरासमोर संशयित आरोपींनी त्यांना गाठले.
जुना वाद उकरून काढत आरोपींनी गजानन ढमाले यांना शिवीगाळ करण्यास सुरुवात केली आणि लाथाबुक्क्यांनी मारहाण केली. भांडण सोडवण्यासाठी गजानन यांची पत्नी सपना ढमाले आणि वडील देविदास ढमाले धावून आले असता, आरोपीने आपल्या कमरेला लावलेला चाकू काढून गजानन यांच्या डाव्या हाताच्या मनगटावर वार केला. त्यानंतर आरोपीने त्यांच्या पत्नीच्या उजव्या हाताच्या मनगटावर आणि वडिलांच्या डाव्या खांद्यावर व हातावर वार करून त्यांना गंभीर जखमी केले.
या घटनेनंतर जखमींनी धरणगाव पोलीस स्टेशन गाठून तक्रार दिली. पोलिसांनी याप्रकरणी गजानन देविदास ढमाले, सपना गजानन ढमाले आणि देविदास मडकू ढमाले या तिघा संशयितांविरुद्ध गुन्हा नोंदवला आहे.धरणगाव पोलीस स्टेशनचे सहायक पोलीस निरीक्षक प्रशांत कंडारे यांच्या मार्गदर्शनाखाली पोहेकॉ विठ्ठल पाटील पुढील तपास करत आहेत.
