जळगाव शहरातील शिवाजी नगरातील घटना
जळगाव (प्रतिनिधी) :- शहरातील शिवाजीनगर भागात दारूच्या नशेत हाती गावठी कट्टा घेऊन घरी आलेल्या मुलाच्या हातून कट्टा हिसकावताना आईच्या हाताला गोळी लागून गंभीर दुखापत केल्याची खळबळजनक घटना शनिवार ११ नोव्हेंबर रोजी रात्री ९.३० वाजता घडली आहे. याप्रकरणी रविवार १२ नोव्हेंबर रोजी दुपारी १२ वाजता शहर पोलीस ठाण्यात गुन्हा दाखल करण्यात आला आहे.
कलाबाई प्रकाश सोनवणे (वय ६०, रा. शिवाजीनगर, जळगाव) या महिला पती, दोन मुले व सून यांच्यासोबत वास्तव्याला आहे. त्या महापालिकेत आरोग्य सेविका म्हणून सेवानिवृत्त आहेत. शनिवार ११ नोव्हेंबर रोजी रात्री ९.३० वाजेच्या सुमारास त्यांचा मुलगा रोहित प्रकाश सोनवणे हा दारू पिऊन घरी आला. त्याच्या हातात गावठी कट्टा होता.
त्यावेळी कलाबाई यांनी मुलाच्या हातातून कट्टा हिसकावण्याचा प्रयत्न केला. या झटापटीत कट्ट्यातून गोळी सुटली व ती कलाबाईच्या उजव्या हाताच्या मनगटाजवळ लागल्याने दुखापत झाली. रक्तस्त्राव होत असताना सुनेने त्यांना खासगी रुग्णालयात दाखल केले. तेथे शस्त्रक्रिया करून हातातील गोळी काढण्यात आली.
याप्रकरणी कलाबाई यांनी शहर पोलिस ठाण्यात फिर्याद दिली. त्यावरून रोहित सोनवणेविरुद्ध गुन्हा दाखल करण्यात आला आहे.
