मुक्ताईनगर ( प्रतिनिधी ) – मुक्ताईनगर तालुक्यातील मधापुरी आणि लालगोटा या परिसरात विविध आमिषे दाखवून फसवणूक तसेच दरोड्याचे गुन्हे करणाऱ्या टोळ्या सक्रिय असल्याच्या पार्श्वभूमीवर, जळगाव पोलीस दलाने शनिवारी (मध्यरात्री) विशेष ‘कॉम्बिंग ऑपरेशन’ (Combing Operation) राबवले. या धडक कारवाईत पोलिसांनी १५ संशयितांच्या मुसक्या आवळल्या आहेत.जळगाव स्थानिक गुन्हे शाखा (LCB) आणि मुक्ताईनगर पोलिसांच्या संयुक्त पथकाने ही कारवाई केली.
दोन वॉण्टेड आरोपींना अटक: ताब्यात घेतलेल्या १५ संशयितांपैकी दोन आरोपी दरोडा आणि लुटीच्या गुन्ह्यात वॉण्टेड (फरार) होते. त्यांना भारतीय न्याय संहितेच्या कलम ३१० (२) अन्वये अटक करण्यात आली आहे.कमलेश्वर ज्ञानेश्वर पाटील (वय ४५) आणि दीपमाला कमलेश पाटील (वय ३८, दोघेही रा. मधापुरी). मुक्ताईनगर पोलिसांत दाखल गु.र.नं. ३६/२०२५ मध्ये ते पसार होते.चोरी आणि दरोड्यासारख्या गुन्ह्यांचा रेकॉर्ड असलेल्या अन्य १३ संशयितांविरोधात पोलिसांनी भारतीय न्याय संहिता कलम १२८ आणि १२९ अन्वये प्रतिबंधात्मक (Preventive Action) कारवाई केली आहे.
प्रतिबंधात्मक कारवाई झालेले संशयित
मधापुरी: रोहित ऊर्फ गुरुदास सुदेश पवार (२५), क्रिश निशांत पवार (१९), किसन दिनु पवार (२१), नितेश रितेश पवार (३०), आर्यमन जिन्नु पवार (१९), गीता नागेश पवार (३८).लालगोटा: धरमसिंग लखनसिंग भोसले (२५), लखनसिंग युवराज भोसले (५०), बाबुसिंग लखनसिंग भोसले (१९), टोनी दर्शनलाल पवार (४३), लकी टोनी पवार (२२) व सदानंद टोनी पवार (२५).हलखेडा: नयन सटा भोसले (२५).
पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि मुक्ताईनगर उपविभागीय पोलीस अधिकारी सुभाष ढवळे यांच्या मार्गदर्शनाखाली ही कारवाई पार पडली. स्थानिक गुन्हे शाखेचे पोलीस निरीक्षक राहुल गायकवाड आणि मुक्ताईनगर पोलीस निरीक्षक आशिशकुमार अडसुळ यांच्या नेतृत्वात सहाय्यक निरीक्षक, उपनिरीक्षक, १३० पोलीस अंमलदार आणि चार आर.सी.पी. (R.C.P.) पथके या ‘कॉम्बिंग ऑपरेशन’मध्ये सहभागी झाली होती.
