धावत्या रेल्वेतून पडल्याने तरुणाचा मृत्यू; वाघूर नदीवरील रेल्वे पुलाजवळ दुर्घटना
जळगाव (प्रतिनिधी) : धावत्या रेल्वेतून खाली पडून डोक्याला गंभीर दुखापत झाल्याने भुसावळ येथील एका ३२ वर्षीय तरुणाचा दुर्दैवी मृत्यू झाल्याची घटना वाघूर नदीवरील रेल्वे पुलाजवळ घडली. ही घटना २४ जुलै रोजी सकाळी सुमारे १०.४५ वाजता उघडकीस आली.
मिळालेल्या माहितीनुसार, कुणाल दिलीप अडकमोल (वय ३२, रा. पंढरीनाथ नगर, भुसावळ) हे रेल्वेने प्रवास करत असताना डाऊन मार्गावरील खांबा क्रमांक ४३७/२३ ते ४३७/२५ दरम्यान वाघूर नदीवरील रेल्वे पुलावरून अचानक खाली कोसळले. या अपघातात त्यांच्या डोक्याला गंभीर दुखापत झाली.
घटनेची माहिती मिळताच त्यांना तातडीने जिल्हा शासकीय वैद्यकीय महाविद्यालय व रुग्णालयात दाखल करण्यात आले. मात्र, वैद्यकीय अधिकाऱ्यांनी तपासणीनंतर त्यांना मृत घोषित केले.
या प्रकरणी नशिराबाद पोलीस ठाण्यात अकस्मात मृत्यूची नोंद करण्यात आली असून, घटनेचा पुढील तपास पोहेकॉ प्रशांत विरणारे करीत आहेत.
